நான் தரிசனம் செய்த கோயில்கள் – மனைவியுடன் யாத்திரை – பகுதி 11 நெல்லைத்தமிழன்

 

நாம் இன்னும் மகாபலிபுரத்தில் ஐந்துரதம் பகுதியில் இருக்கிறோம்.  ஒவ்வொரு ரதமும் ஒவ்வொரு கடவுளுக்கு அர்ப்பணிக்கப்பட்டிருக்கிறது என்கிறார்கள். தர்மராஜா ரதம் இருப்பதிலேயே பெரியது. இது சிவனுக்கு அர்ப்பணிக்கப்பட்டிருக்கிறது. அடுத்து பீம ரதம் விஷ்ணுவிற்கும், அர்ஜுன ரதம் இந்திரனுக்கும், நகுல சஹாதேவ ரதம் யமனுக்கும், திரௌபதி ரதம் துர்கைக்கும் அர்ப்பணிக்கப்பட்டுள்ளன. இதனை, அந்த அந்த ரதங்களின் சுற்றுப்புறச் சுவர்களில் செதுக்கப்பட்ட சிற்பங்களைக் கொண்டு அறுதியிட்டிருக்கிறார்கள்.

இந்தப் பகுதியில் ஐந்து ரதம் மற்றும் ஒரு சிங்கம், எருது (நந்தி), யானை மற்றும் பாறையில் செதுக்கப்பட்ட இன்னும் சில அமைப்புகளும் இருக்கின்றன. இவை 7ம் நூற்றாண்டில் செதுக்கப்பட்டவை என்பதை நினைவில் கொண்டால், அவர்களுக்கு எத்தகைய திறமை இருந்திருக்கும் என்பது தெரியும். பாறையைக் குடைந்து இந்த மாதிரி ரதமோ கோயிலோ அமைக்கும்போது மேலிருந்து கீழாகத்தான் அவர்கள் வேலைசெய்திருக்கவேண்டும். அது எவ்வளவு கடினமான வேலை…யோசித்துப் பாருங்கள்.

இணையத்திலிருந்து… ஐந்து ரதங்களின் பெயர்களோடு

இதை ஆங்கிலேயர் காலத்தில் ஏழு கோயில் பகுதி என்று குறிப்பிட்டிருக்கின்றனர். அதையொட்டித் தயார் செய்யப்பட்ட பழைய போஸ்டர் (இணையம்). 

வெளிப்புறச் சுவர்கள் இழைக்கப்படவில்லை, பல சிற்பங்களையும் இன்னும் செதுக்கவில்லை. இதுவே இந்தப் பகுதியில் வேலைகள் பாதியில் நின்றுவிட்டன என்பதைக் காட்டும்.

கற்பாறைகளைச் செதுக்கி (குடைந்து) கோவிலாக எப்படி மாற்றியிருக்கிறார்கள் பாருங்கள். இது நம் ஐந்தாம் நூற்றாண்டின் சிற்பிகளின் திறமை (உலகின் பல்வேறு பகுதிகளில் நாகரீகம் வளராத காலம்). அருகிலிருக்கும் குடவரைக் கோயிலின் கோபுர மாடலைப் பார்த்து, இதுதான் இராஜராஜ சோழனுக்கு தஞ்சப் பெரிய கோயில் கட்டத் தூண்டுதலாக இருந்திருக்குமா என்று நினைக்க வைக்கிறது.

பாறையைக் குடைந்து அதில் தூண்கள் மண்டபங்கள் என்று செதுக்கி-யிருக்கிறார்கள். ஓரளவு குறைந்த தொழில்நுட்பத்தை வைத்துக்கொண்டு அவர்கள் செய்தது மிகப் பெரிய சாதனைதான்.

தர்மராஜா ரதத்தில் பல்வேறு பட்ட சிற்பங்கள் உள்ளன. அவை, ஸ்கந்தா, சிவா, நரசிம்ஹவர்மன், பைரவர், சந்திரசேகரர், ஹரிஹரர், பிரம்மா மற்றும் அர்த்தநாரீஸ்வரர் போன்றவை. நான் ஒவ்வொன்றாகப் படமெடுக்கவில்லை.

 

 ஒற்றைக்கல் யானைச் சிற்பத்தை ஐராவதம் என்கிறார்கள். அதற்கு அந்தப் புறத்தில் இந்திரன் சிற்பம் (நகுல சகாதேவ ரதம்) இருக்கிறது என்கிறார்கள்.

 

தர்மராஜா ரதத்தில்  அர்த்தநாரீஸ்வரர், அதை அடுத்து சிவன் இரண்டு சிற்பங்களும் அமைந்துள்ளது தெரிகிறதா?

 

யானையின் தந்தம் இரண்டு பக்கங்களிலும் காணவில்லை. அகழ்வாய்வின்போதே இல்லையா இல்லை காலம் செய்த கோலமா என்று தெரியவில்லை.

ஞாயிற்றுக் கிழமை என்பதால் அப்போதே நிறைய மக்கள் வருகை தந்திருந்தனர். நேரம் சென்றால் புகைப்படம் எடுக்கவே முடியாத அளவு கூட்டம் இருந்திருக்கும்.

நகுல சகாதேவன் ரதத்திற்கு அருகிலுள்ள யானை (ஒற்றைக் கல்லில் வார்த்தது) நிஜ யானை அளவு.

உங்களுக்குத் தெரியுமா? இந்த ஐந்துரதம் பகுதியில் பல, மண்ணிலிருந்து அகழ்வாய்ந்தபோது கிடைத்தவை. ஒருவேளை இன்னும் இந்த இடத்தைச் சுற்றித் தோண்டினால் வேறு சிற்பப் புதையல்கள் கிடைக்குமோ என்னவோ. இன்னொன்று எனக்கு இவற்றில் பல பகுதிகள் முழுமையாக முடிந்த மாதிரித் தோன்றவில்லை. இடையில் ஏற்பட்ட படையெடுப்புகளினாலா?

ஐந்துரதம் அருகிலும் மற்றும் மாமல்லபுரத்தின் பல பகுதிகளிலும் சிற்பக்கூடங்கள் இருக்கின்றன.

நிறைய புத்தர் சிற்பங்கள் இருந்தன (சிற்பக்கூடத்தில்). இப்போதும் நம்மிடம் மிகுந்த திறமையுள்ள சிற்பிகள் இருக்கின்றனர். நான் தாராசுரம் சில வாரங்கள் முன்பு சென்றிருந்தபோது,  அதையொட்டிய தெருவில் (அந்தக்காலத்தில் மாடவீதியாக இருந்திருக்கலாம்) ஒரு காளை மாட்டையும் அதை அடக்கும் ஒரு வீரன் சிலையை (சிற்பம் என்றுதான் சொல்லணும்) பார்த்தேன். தூரத்தில் பார்த்தபோது நிஜ காளைமாட்டை ஒருவன் அடக்குவதாகத்தான் எனக்குத் தோன்றியது. பிறகு அருகில் சென்று பார்த்தபோதுதான் அது சிற்பம் என்று புலப்பட்டது. அந்தச் சிற்பக்கூடத்தைச் சேர்ந்தவரிடம் பேசிக்கொண்டிருந்தேன், அவர் திறமையை வெகுவாகப் பாராட்டினேன் (அந்தப் படம் பிறகு ஒரு சந்தர்ப்பத்தில் பகிர்கிறேன்)

ஐந்து ரதங்கள் பகுதியைப் பார்த்த பிறகு ஆட்டோவில் கோவில் அருகில் இறங்கிக்கொண்டோம். அங்கிருந்து கடற்கரை கோவிலுக்குச் சென்றோம். நான் இதற்கு முன்பு 1990ல் சென்றிருந்தேன். அப்போது கடற்கரை கோவிலை அலைகள் மோதும். ஆனால் இப்போதோ தொல்லியல் துறை கொஞ்சம் கவனம் செலுத்தி அந்த இடத்தை மேடாக்கி வைத்திருப்பதாக எனக்குத் தோன்றியது.  அதைப் பற்றி அடுத்த வாரம் பார்க்கலாமா?

 (தொடரும்)