"OTP நம்பர் வரும்.. சொல்லுங்க"

  

எங்கு விட்டேன்?  காஸ் ஏஜென்ஸியில் ஃபோன் எடுக்கவில்லை என்று சொன்னேன் அல்லவா....  சட்டென்று வேறு ஒரு காரியம் செய்தேன்.

வீட்டுக்கு சிலிண்டர் போடும் முருகனை (பெயர் மாற்றப்பட்டுள்ளது) ஃபோனில் அழைத்தேன்.  அவர் செல் ஸ்விட்ச் ஆஃப் செய்யப்பட்டிருந்தது.  நான்கைந்து மாதங்களாகத்தான் முருகன் எங்களுக்கு சிலிண்டர் போடுகிறார்.  அதற்குமுன் போட்டவர் ராஜேந்திரன் (ஆம்.  பெயர் மாற்றப்பட்டுள்ளது) அவரை அழைத்தேன்.

'நான் இப்போ உங்கள் ஏரியா இல்லையே என்று தொடங்கியவரை இடைமறித்து விஷயத்தை விளக்கி, 'இப்படி ஒன்று நடைபெறுகிறதா?' என்று கேட்டதும், அவர் 'ஆம்.  இந்த மாதத்துக்குள் முடிக்கச் சொல்லி இருக்கிறார்கள்.  KYC..  இது முடித்தால்தான் உங்களுக்கு அடுத்த சிலிண்டர்' என்று பீதியூட்டினார்.  'ஏஜென்சி நம்பர் போட்டால் எடுக்கவில்லை' என்றதும் 'சிலிண்டர் சப்ளை செய்த 'பில்'லில் மூன்று எண்கள் இருக்கும் பாருங்கள்...  அதை அழையுங்கள் என்று கூறி ஃபோனைத் துண்டித்தார்.  

அட, ஆமாம்...

அந்த எண்ணில் அழைத்ததும் ஃபோன் எடுக்கப்பட்டது.

"வணக்கம்...  Gகனி (ஹிஹிஹி...  பெயர் மாற்றப்பட்டுள்ளது) ஏஜென்ஸி..  காஸ் புக் பண்ணனுமா... கன்ஸ்யூமர் நம்பர் சொல்லுங்க" என்று இயந்திர கதியில் ஆரம்பித்த பெண்ணை இடைமறித்து விவரம் கேட்டேன்.

சிரிப்பு வந்து விட்டது அந்தப் பெண்ணுக்கு..  கொஞ்சம் முன்ஜாக்கிரதையாய் இருந்து விடக்கூடாதே...

"ஆமாம்..  வருவார்கள்...  உங்கள் ரேகை, கண் எல்லாம் பதிவெடுப்பார்கள்...  உங்கள் ஸ்டவ், டியூப் எல்லாம் செக் செய்வார்கள்"  என்றார்.

"முன்னரே கஸ்டமர்களுக்கு இதைப் பற்றி எல்லாம் அறிவிப்பு தரமாட்டீர்களா?  எத்தனை பேரை நியமித்திருக்கிறீர்கள்?"

"மூன்று பேர் ஸார்"

"மூன்று பேர்களின் பெயர்களையும் சொல்ல முடியுமா?"

அவர் சொன்ன மூன்று பேர்களின் பெயர்களில் எங்களை அழைத்தவர் பெயரும் இருந்தது.  

"ஐடி கார்ட் கொடுத்திருக்கோம்...  செக் செய்து உள்ளே விடுங்கள் சார்"  என்று சின்னச் சிரிப்புடன் கூறி ஃபோனை கட் செய்தார் அந்தப் பெண்.  

என்ன சிரிப்போ...

எரிச்சலுடன் என்னை முதலில் அழைத்த தனசேகருக்கு கால் செய்தேன்.  யாரிடமோ பேசிக்கொண்டிருந்தார், பின்னர் அவரே என்னை அழைத்தார்.

விவரம் சொல்லி அட்ரஸும், லொகேஷனும் கொடுத்தேன்.  மாலை வந்தார்.

வந்தது ஒரு சின்ன பையன்.  இருபது வயதிருக்கும்.  B Sc Maths படித்திருக்கிறா(னா)ராம்.  இருபதாயிரம் ரூபாய் தருகிறேன் என்று சொல்லி இருக்கிறார்களாம்.  பெர்மனெண்ட் செய்கிறேன் என்றும் சொல்லி இருக்கிறார்களாம்.  இந்த மாதத்தோடு இந்த டாஸ்க் முடிக்க வேண்டும்.  எப்படி நிரந்தரம் ஆக்குவார்களோ...  பாவம் பையன்.  திருப்பத்தூரிலிருந்து சென்னை வந்து ரூம் எடுத்து தங்கியிருக்கிறானாம்.

அவரையும், அவர் ஐடி கார்டையும் புகைப்படம் எடுத்துக் கொண்டேன்.  அசௌகரியமாக சிரித்தான் பையன்.  "என்னப்பா செய்யறது...  மக்களை இப்படி ஏமாற்றி பயமுறுத்தி வச்சிருக்காங்களே" என்றேன்.

கண்ணை படம் எடுத்தான்.  இமைக்காகச்சொல்லி ஒருதரம் எடுத்தான்.  ஒரு படிவத்தில் நிரப்பி கையெழுத்து வாங்கி கொண்டு "நூறு ரூபாய் கொடுங்க" என்றான்.  "என்னப்பா...  இருபது ரூபாய்க்கு வேலை பார்த்துட்டு நூறு ரூபாய் கேட்கறியே" என்று சொன்னாலும் எடுத்துக் கொடுத்தேன்.  எதற்கு அந்த நூறு ரூபாயோ...   பையனுக்காகவே என்றிருந்தாலும் கொடுக்கவே தோன்றியது.

இப்படியாக ஒரு அனுபவப் படலம் முடிந்...   இல்லை, இன்னும் முடியவில்லை.  இரண்டு நாள் கழித்து மறுபடி இன்னொரு அறியா எண்ணிலிருந்து அலைபேசி வந்தது.  வீட்டில் ACT  ஃபைபர்நெட் டுடன் போராட்டம் நடந்து கொண்டிருப்பதால் எந்த எண்ணிலிருந்து வந்தாலும் உடனே எடுத்து விடுகிறேன்.  ஏனென்றால் அவர்களுக்கு தப்பிப்பதற்கு பல வழிகள் வைத்திருக்கிறார்கள்.  எவர்கள்?  ACT காரர்கள்.  வராத காலை செய்ததாய் சொல்லி புகாரை மூடி விட்டார்கள்!

என்னுடைய ஹெல்த் பாலிஸி, ACT Internet ஆகியவை இந்த மாதம் சப்ஸ்க்ரைப் செய்ய வேண்டும்.  பேங்க்கிலிருந்து KYC க்கு கூப்பிடுகிறார்கள்.  இவை யாவற்றையும் என்னுடைய சாம்ஸங் ஃபோன் சகட்டுமேனிக்கு ஸ்பாம், பொட்டன்ஷியல் பிராட், பிராட் என்றெல்லாம் வகைப்படுத்துகிறது.  அவை எல்லாவற்றையும் எடுத்துப் பேசி விடுகிறேன்.  அதனாலும் பயம் வருகிறது.

இந்த எண்ணுக்கு அப்படி எச்சரிக்கை எதுவும் வரவில்லை.  பேசினால் நான் Gகனிகாஸ் ஏஜென்சியிலிருந்து பேசுகிறேன் என்று ஒரு பெண் தொடங்கி, ஆள் வந்தாரா என்று கேட்டார். ஆம் என்றேன்.  காஸ் லீக், டியூப் எல்லாம் செக் செய்தாரா என்று கேட்டார்.  தனா செய்யவில்லை என்றாலும் ஆம் என்று சொல்லி விட்டேன்.  இல்லை என்றால் திருப்பி வேறு ஆளை அனுப்பினால் விளையாட்டை முதலிலிருந்து ஆடவேண்டும்!  "அப்டேட் செய்துக்கவா?" என்றார்.  ஓ எஸ் என்றேன்.  இங்குதான் மறுபடி என் எச்சரிக்கை உணர்வுக்கு சோதனை வந்தது.

"OTP நம்பர் வரும்..  சொல்லுங்க" என்றார்.   'ஆ...  மறுபடியுமா?'  அழைப்போ பெயர் இல்லாத ஒரு எண்ணிலிருந்து வந்திருக்கிறது.

அவர் லைனிலேயே காத்திருந்தும், 'வரவில்லையே...  வரவில்லையே...  இன்னும் வரவில்லையே.....'  (உண்மையில் வந்திருந்தது_) என்று டபாய்த்தேன்.  'சரி சார் போனை வைக்கிறேன்.  வந்ததும் கால் பண்ணுங்க' என்று அவர் போனை கட் செய்தார்.     தெரியாத நம்பரிலிருந்து அழைத்து OTP கேட்டால் பின்னே....

ஓடு... மறுபடி இளையவனிடம்.....

ட்ரூ காலரில் பார்த்து எங்கள் ஏஜென்சி பேயரைச் சொன்னான்.  கொஞ்சம் நிம்மதி வந்து அவரை அழைத்து OTP  நம்பர் சொன்னேன்.  லைனிலேயே ஏதோ  'டக்டக்' கென்று சத்தம் கேட்க வேலை செய்தவர் (என் இதயமும் அப்படிதான் துடித்தது) "இப்போ இன்னொரு OTP வரும் அதைச் சொல்லுங்க" என்றார்.

அதற்குள் அருகில் வந்த இளையவன் "சமயங்களில் அவர்கள் ஃபோனில் அவர்கள் இந்த ஏஜென்சி பெயரைப் போட்டு Save  செய்து கொண்டால் நமக்கு இந்தப் பெயர்தான் காட்டும்"  என்று பீதியூட்டிவிட்டுச் செல்லவும், நான் இரண்டாவது OTP  நம்பரையும் சொல்லி முடிக்கவும் சரியாய் இருந்தது.

'அப்படியும் இருக்குமோ.....'   ஐயோ....

அடுத்த 72 மணி நேரம் பயத்திலேயே கழிய, கடைசியில் அந்த மெசேஜ் வந்து என் பயத்தை நீக்கியது!

 

பின்குறிப்பு : கவனித்தீர்களா, இப்போது ஃபோன் செய்தாலே கால் கனெக்ட் ஆகும் முன்பு கொரோனா காலத்தில் ப்ளேடு போட்டது போல இந்த ஸைபர் கிரைம் பற்றிய எச்சரிக்கை செய்தி பேசுகிறார்கள்.....நான் இதுபற்றி எழுதுகிறேன் என்று தெரிந்ததுமே ஏதாவது பிரச்னை வந்துவிடப் போகிறது என்று முந்திக் கொள்கிறார்கள்!

======================================================================================================

KB.....

நாகேஷை வைத்து 36 படங்களுக்கும் மேல் இயக்கினார். கமலை வைத்து 27 படங்கள் பண்ணினார். ஸ்ரீப்ரியா, ஜெயசித்ரா, ஜெயசுதா, ஸ்ரீவித்யா, சுஜாதா, ஜெயந்தி, சரிதா, கீதா, ஜெயப்ரதா, சுமித்ரா, ஷோபா என நடிகைகளை நடிக்கப் பயன்படுத்துகிற அளவுக்கு கேரக்டர்கள்.

தமிழ் சினிமாவில் அதிக அளவில் நடிகர் நடிகைகளை அறிமுகம் செய்தது பாலசந்தராகத்தான் இருக்கும். கிட்டத்தட்ட 65க்கும் மேற்பட்டவர்களை அறிமுகப்படுத்தி, இதில் முக்கால்வாசிபேரை நம் மனதில் நிற்கவைத்தும் சாதித்தவர் பாலசந்தர். எம்ஜிஆர் - சிவாஜிக்குப் பிறகான அந்த இடத்தை, கமல் - ரஜினியை உருவாக்கி நிரப்பினார். தன்னைச் சுற்றியுள்ள கலைஞர்களை அற்புதமாகப் பயன்படுத்துவார். எம்.எஸ்.வி.யின் மிகச்சிறந்த இசையை தன் படங்களுக்குள் இணைத்திருக்கிறார். ‘எத்தனையோ இயக்குநர்களின் படங்களுக்கு பாட்டு எழுதியிருக்கிறேன். பாலசந்தருக்கு பாட்டு எழுதுவதுதான் சிரமமாக இருக்கும். ஒரு பாட்டுக்குள் படத்தின் ஜீவன் மொத்தத்தையும் சொல்லச் சொல்லுவார்’ என்று தெரிவித்துள்ளார் கவியரசு கண்ணதாசன். இசையைப் போலவே பாடல்களும் தனியிடம் பிடித்தன.

‘தெய்வம் தந்த வீடு’ ஒரு மாதிரி. ‘கடவுள் அமைத்து வைத்த மேடை’ இன்னொரு மாதிரி. ‘ஏழு ஸ்வரங்களுக்குள்’ பாடலும் ‘கேள்வியின் நாயகனே’வும் புதுவிதம். ‘சிப்பி இருக்குது முத்தும் இருக்குது’, ‘இலக்கணம் மாறுமோ’, ‘ஹலோ மை டியர் ராங் நம்பர்’, ‘ஓடுகிற தண்ணியில’, ‘கனாக்காணும் கண்கள் மெல்ல’, ‘ஆண்டவனின் தோட்டத்திலே’, ’சொல்லத்தான் நினைக்கிறேன்’ , ‘பூமாலை வாங்கி வந்தால்’, ‘என்ன சத்தம் இந்த நேரம்’, ‘கல்யாண மாலை கொண்டாடும் பெண்ணே’, ‘காதோடுதான்’... என்று இன்னும் இன்னுமாகச் சொல்லிக் கொண்டே போக பாடல்கள் வரிசைகட்டி நிற்கின்றன.

‘அரங்கேற்றம்’ டால்டா டப்பாவுடன் திரியும் மனப்பிறழ்வுப் பெண், ‘மூன்று முடிச்சு’ மனசாட்சி, ‘எதிர்நீச்சல்’ இருமல் தாத்தா என்று இவர் கேரக்டர்கள் நம்மை ஏதோ செய்யும். எனக்குத் தெரிந்து கருப்பு வெள்ளைப் படங்களை கலர் பட காலகட்டத்திலும் அதிகமாய் எடுத்தது பாலசந்தராகத்தான் இருக்கும்.அவள் ஒரு தொடர்கதை விகடகவி கோபால், அவர்கள் ராமனாதன், அபூர்வ ராகங்கள் பிரசன்னா, சிந்துபைரவி ஜே.கே.பி. மனதில் உறுதி வேண்டும் நந்தினி, எதிர்நீச்சல் மாது, வறுமையின் நிறம் சிகப்பு திலீப், நினைத்தாலே இனிக்கும் சந்துரு, அவர்கள் அனு, அபூர்வ ராகங்கள் பைரவி... என ஒவ்வொரு கேரக்டர்களிலும் உயிர்ப்பு... ஜீவன்! அதுதான் கே.பி. டச்!

இன்றைக்கு ரெண்டு மணி நேர சினிமாவில், காமெடி டிராக், புரியாத அஞ்சு பாட்டு, தூக்கிப் பிடிக்கும் ஹீரோயிஸம். ஆனால் ஹீரோ பேர் மறந்து கேரக்டர் பெயர், கதை, உணர்வு, வலிகளைச் சொல்லும் பாடல், படம் முழுவதும் விரவியிருக்கும் காமெடி... என நிரம்பி வழியும் கே.பி.யின் படங்களில்!

ஊருக்குப் போய்விட்டதைக் காட்ட ரயிலைக் காட்டுவார்கள் சினிமாவில். ஆனால் பத்துப்பையன்கள், ஒருவர்பின் ஒருவராகச் சட்டையைப் பிடித்துக் கொண்டு, ரயில் மாதிரி செல்வதைக் காட்டுவார். ஒரு வாரத்தைக் காட்ட, படபடவெனப் பறக்கும் தினசரிக் காலண்டரைக் காட்டுவார்கள். கல்கி, விகடன் என ஒவ்வொரு நாளும் வருகிற புத்தகங்களைக் கொண்டே ஒருவாரத்தைக் காட்டியிருப்பார்.

பூவா தலையா படம். அத்தைக்கு கட்டுப்படும் மருமகப்பிள்ளை. தலையாட்டி பொம்மை ஆடுவதையும் பீரோவில் தொங்கும் சாவிக்கொத்தையும் காட்டியிருப்பார். ’எதிர்நீச்சல்’ படத்தில் இருமல் தாத்தா, ’அவர்கள்’ பொம்மை, டெலிபோன், அருவி, ஃபடாபட் எனும் சொல், விளக்கை அணைத்து எரிய வைத்து அணைக்கும் லவ் சிக்னல்... அவள் ஒரு தொடர்கதை வில்லனின் கை மடக்கி விரிக்கும் ஸ்டைல் என கே.பி. விடும் ரகளைக்கும் அவரின் ரசனைக்கும் பஞ்சமே இல்லை.

அழுகாச்சி கேரக்டராகவே செளகார் ஜானகிக்குக் கொடுத்துக் கொண்டிருந்த காலகட்டத்தில் அடுத்தாத்து அம்புஜத்தைப் பாத்தேளா என்று எதிர்நீச்சலிலும் தில்லுமுல்லுவிலும் வாய்ப்பை வழங்க, அதைக் கொண்டு அதகளம் பண்ணியிருப்பார் செளகார் ஜானகி.

எதிர்நீச்சல் படத்தில், திருடி விட்டு மாட்டிக் கொள்வார் தேங்காய் சீனிவாசன். அடித்ததில் விழுந்திருப்பார். போலீஸில் சொல்லிவிடலாம் என்று ஒருவர் சொல்ல, ‘வேணாம் சார். விழுந்துட்டாரு. எழுந்திருக்கும் போது, நல்லவனாத்தான் சார் எழுந்திருப்பாரு’ என்று வசனம்.

அவள் ஒரு தொடர்கதையில், ‘பொண்ணு கல்யாணத்துக்கு முன்னாடியே இவ்ளோ கர்வமா இருக்கா’ என்று விஜயகுமாரின் அம்மா கேரக்டர் சொல்ல, ‘கல்யாணத்துக்கு முன்னாடி கர்வமா இருக்கலாம். கர்ப்பமாத்தான் இருக்கக் கூடாது’ என்று சட்டெனச் சொல்லுவார் சுஜாதா.

நினைத்தாலே இனிக்கும் ஜெயப்ரதா, தலையை ஆட்டி ஆமாம் சொல்லிவிட்டு, பிறகு மெல்ல மெல்ல தலையை இப்படியும் அப்படியும் ஆட்டிவிட்டு, இல்லை என்று சைகையில் சொல்வதை, செய்யாத, செய்து பார்க்காத ரசிகர்களே அப்போது இல்லை.

காட்சி கவிதையாய் இருக்கும். பாடலில் கதையே சொல்லப்படும். வசனத்தில் அவ்வளவு ஷார்ப் வைத்திருப்பார். நடிப்பில் அவ்வளவு யதார்த்தம் குடிகொண்டிருக்கும்.

நன்றி: இந்து தமிழ் திசை, கந்தசாமி R, Face Book

====================================================================================================================================================

என் சி வசந்த கோகிலத்தின் சோக வாழ்க்கை கைவிட்ட கணவன் காசநோய் 32 வயதில் மரணம்

1930களில் அன்றைக்கிருந்த பெண் இசை கலைஞர்களோடு நட்சத்திரமாக மின்னியவர் என்.சி. வசந்த கோகிலம் நாகப்பட்டினம் சந்திரசேகர வசந்த கோகிலம் என்பது இவரது முழுப்பெயர் கேரள மாநிலத்தில் கொச்சி சமஸ்தானத்துக்குட்பட்ட இரிஞ்சாலக்குடா எனும் ஊர்தான் பூர்வீகம்.

1936ல், இவரது 17வது வயதில் இவர் குடும்பம் சென்னைக்குக் குடிபெயர்ந்தது. அதற்குள் இவர் கர்நாடக சங்கீதத்தில் நல்ல தேர்ச்சி பெற்றிருந்ததால், சென்னை வந்தவுடன் பல இடங்களில் கச்சேரி செய்ய அழைக்கப்பட்டார். இவருடைய இனிய குரலும்,அழகிய தோற்றமும், இவர் பாடும் கச்சேரிகளுக்கு மக்கள் வெள்ளம்போல் வரத் தொடங்கினர்.

திரைப்படங்களிலும் பின்னணி பாடல்கள் பாடி புகழ் பெற்றார். அன்றைய காலகட்டத்தில் தமிழகத்தில் மிகவும் புகழ்பெற்று விளங்கிய சுத்தானந்த பாரதியாரின் பாடல்களையும் இவர் பாடி பிரபலப் படுத்தியிருக்கிறார். பொதுவாக தெலுங்கு மொழியிலும், சம்ஸ்கிருத மொழியிலும் அமைந்த பாடல்களையே பிரபலமான வித்வான்கள் பாடிவந்த நிலையில் வசந்தகோகிலம் தமிழில் பாடல்களை பாடினார்.

1940ல் "சந்திரகுப்த சாணக்கியா" எனும் படத்தில் இவர் இளவரசி சாயா தேவியாக நடித்தார் தொடர்ந்து அதே ஆண்டில் "வேணுகானம்" 1942ல் "கங்காவதார்", 1944ல் எம்.கே.தியாகராஜ பாகவதர் நடித்த "ஹரிதாஸ்", 1946ல் ஹொன்னப்ப பாகவதர் நடித்த "வால்மீகி" "குண்டலகேசி" ஆகிய படங்களில் நடித்தார். 1950ல் இவருடைய கடைசி படமான "கிருஷ்ண விஜயம்" வெளியானது. இவர் நடித்த அத்தனை படங்களும் ஹிட்டானது.

முதல் திருமணம் 15வயதில் நடந்தது. ஆனால் அந்த கணவருக்கு இசை 'பிடிக்காமல் போகவே அவரை விட்டு பிரிந்தார். பின்னர் திரைப்பட இயக்குனர் சி.ரி. சதாசிவம் என்பவரை மணந்து கொண்டு வாழ்ந்தார். இளம் வயதிலேயே காசநோயால் பாதிக்கப்பட்டார். அப்போது அந்த நோய்க்கு உயர் சிகிச்சை இல்லாததால் 1951ல் தனது 32வது வயதில் சென்னை கோபாலபுரத்தில் இருந்த இவரது இல்லத்தில் இவர் காலமானார்

தினமலர் ஃப்ளாஷ்பேக் 11 12 2024

==============================================================================================

"பஷீர் ஐம்பத்தைந்து ஆண்டுகளுக்கு முன்பு எழுதி வெளியிட்ட நாவல் ‘பால்யகால சகி’. இன்றுவரை வெவ்வேறு தலைமுறை வாசகர்களால் தொடர்ந்து வாசிக்கப்பட்டுவரும் மலையாளப் படைப்பும் இதுதான்.
தோல்வியடைந்த காதலின் கதை என்னும் எளிய தோற்றத்துக்குப் பின்னால் பஷீரின் சொந்த அனுபவங்களின் சாயலும் இஸ்லாமியப் பின்புலமும் உணர்ச்சிப் பெருக்கும் கொண்ட புனைகதை ‘பால்யகால சகி’. எழுத்தின் கூறுகளாக மட்டுமல்லாமல் வாழ்க்கையின் அம்சங்களாகத் திரண்டிருப்பது தான் நாவலை இலக்கிய முக்கியத்துவம் கொண்டதாகவும் தொடர்ந்து வாசிக்கக் கூடியதாகவும் ஆக்குகிறது. அதன் பின்னுள்ள படைப்பு மனம்தான் பஷீரை மலையாளப் படைப்பாளிகளில் ‘உம்மிணி வலிய ஓர் ஆளாக’ - இன்னும் பெரிய ஒருவராக - ஆக்குகிறது. ‘பால்யகால சகி’க்கு இன்று உருவாகியிருக்கும் செவ்வியல் தகுதியும் அதனால்தான்."

அந்தப் புத்தகத்திலிருந்து ஒரு பகுதி....

....... நல்ல மனதை நம்பி எவ்வளவு நாள் வாழ்வது? அங்கே மஜீது மட்டும்தான். இருக்கிறான் என்றால் அவளுக்கு எந்த மனவருத்தமும் ஏற்பட்டிருக்காது.

மஜீதின் வாப்பாவிடமோ உம்மாவிடமோ சகோதரிகளிடமோ அவளுக்கு எந்தப் பிணக்கமும் கிடையாது. இருந்தாலும் மஜீதிடமுள்ள எதுவோ ஒன்று மற்றவர்களிடமில்லை. மஜீது அவளது எதிரில் இருக்கும்போது எதுவும் தோன்றுவதில்லை. அவன் இல்லாதபோது மனதில் ஏதோ குறைபாடு. மஜீது காலையில் பாடசாலைக்குப்போனால் சாயுங்காலம் திரும்பி வருவதுவரை அவளுக்குள் ஒரு சஞ்சலமிருக்கும். மஜீதுக்கு உடம்புக்கு ஏதாவது வந்தால் அவளுக்குத் தூக்கம் வராது. எப்போதும் மஜீதின் பக்கத்திலேயே இருக்க வேண்டும். இரவு பகல் பாராமல் அவனுக்குப் பணிவிடை செய்ய வேண்டும்.

அவளது ஆசையைப் பூர்த்திசெய்வதுபோல் அப்போது ஒரு சம்பவம் நடந்தது. மஜீதின் வலதுகாலில் ஒரு விஷக் கல் குத்திவிட்டது. அது, பட்டணத்தில் உயர்நிலைப் பாடசாலைக்குப் படிக்கச் சென்ற நான்காம் ஆண்டு.பாடசாலையிலிருந்துத் திரும்பி வரும்போது காலில் வேதனை தொடங்கியது. நொண்டியபடியே அவன் வீட்டில் வந்து ஏறினான். மறுநாள் காலின் அடிப்பாகத்தில் கட்டி பழுத்துத் தெரிந்தது. உடல் முழுவதும் வலியும் வேதனையும். மஜீது கட்டிலில் கிடந்து நெளிந்துகொண்டிருந்தான். கட்டி உடைந்தால் வலிகுறைந்து விடுமென்று எல்லோரும் சொன்னார்கள். ஆனால், யாராவது பக்கத்தில் சென்றால்கூடபோதும், மஜீது அழுதுவிடுவான்.

அங்கே, எப்போதுமே ஆட்களின்கூட்டம்தான். அவனைப் பார்க்க வருபவர்கள் இல்லாத நேரமாகப் பார்த்து சுகறா அறைக்குள் சென்று மஜீதின் கால்பக்கத்தில் நின்று வீங்கியிருந்த காலில் ஊதிவிட்டுக் கொண்டிருப்பாள். பெரிய, மஞ்சள் நிறக் கொய்யாப்பழம் போல் அது காலிருந்து புடைத்து பழுத்து, வீங்கியிருந்தது. மஜீதால் வலியைத் தாங்கிக்கொள்ளவே முடியவில்லை.

சொகறா, நான் மரிச்சுப் போவேன்."மஜீது வருத்தத்துடன் சொன்னான்.

என்ன செய்யமுடியும்? அவளுக்கு ஒன்றுமே தோன்றவில்லை. அழுகைதான் வந்தது. அவள் மஜீதின் பாதத்தைத் தனது கன்னத்துடன் சேர்த்துப் பிடித்தாள்.

உள்ளங்காலில் அழுத்தமாக ஒரு முத்தம் பதித்தாள்.

முதல் முத்தம்!

அவள் எழுந்து அவனது கொதிக்கும் நெற்றியைத் தடவியபடியே அந்த முகத்தின் மீது குனிந்தாள்.

சுகறாவின் கூந்தல் அவிழ்ந்து மஜீதின் நெஞ்சில் விழுந்து பரந்தது அவளுடைய மூச்சுக்காற்று அவனது முகத்தில் பதிந்தது. சுகறாவின் முழுமையான வாசம். மின்னோட்டம், அவனது நாடி நரம்புகளை அதிரச்செய்துகொண்டிந்தது காந்தத்தால் ஈர்க்கப்பட்டதுபோல மஜீதின் முகம் மேலெழுந்தது. கைகளிரண்டும் அவளது கழுத்தைச் சுற்றி வளைத்துக்கொண்டன. அவளை, அவன் நெஞ்சோடு சேர்த்தணைத்து தன்னில் சுவீகரித்துக்கொண்டான்.

"சொகறா!" 

"ம்...?"

சுகறாவின் சிவந்த உதடுகள் மஜீதின் உதடுகளில் பதிந்தன.

வாழ்க்கையின் தொடக்கக்காலம் முதலாக இருந்த நட்புதானென்றாலும் அன்று, முதன்முதலாகக் கிளர்ந்தெழுந்த உணர்வுகளுடன் அவர்கள் பரஸ்பரம் ஒட்டிக்கொண்டார்கள் ஆயிரமாயிரம் முத்தங்களை பரஸ்பரம் பரிமாறிக் கொண்டார்கள். கண்கள், நெற்றி, கன்னங்கள், கழுத்து மார்பு உடல்கள் நடுங்க சுகமான ஒரு பதற்றம். புதிதாக ஒரு ஆசுவாசமும். எதுவோ நிகழ்ந்திருக்கிறது. என்ன அது?

"கட்டி உடைஞ்சி போச்சு." சிறு புன்சிரிப்புடன் இனிமையான சங்கீதம்போல் சுகறா கிசுகிசுத்தாள்.

மஜீது எழுந்து அமர்ந்தான். ஆச்சரியம் ..! கட்டி உடைந்து போயிருந்தது. வெட்கத்தால் தாழ்ந்த சுகறாவின் மோகம் படிந்த முகத்தை மஜீது பார்த்தான். அந்தப் பவள உதடுகளின் இனிமையும் அந்த முதல் முத்தங்களின் மயக்கும் மென்மையும்!

சுகறா முத்தம் பதித்த வலது உள்ளங்காலில் இனம் புரியாத குளிர்ச்சி..!

சுகறாவால் அன்றிரவு தூங்க முடியவில்லை. உடல் முழுக்க சூடாக அவள் கரைந்துகொண்டிருந்தாள்.

சுகறாவின் வாழ்க்கையில் ஒரு நோக்கமிருந்தது. ஆனால், அதன் சாத்தியங்களைக் குறித்து சிந்திப்பதற்கு அவளுக்குப் பயமாக இருந்தது.

பெரும் நிச்சயமற்ற தன்மைகளுடன் அவளது தினப்படி வாழ்க்கை அப்படியே கழிந்துகொண்டிருந்தது......

=========================================================================================================

திருச்சி அருகே திருவானைக்காவல் அகிலாண்டேஸ்வரிகோவிலில் உள்ள யானை நடிகர் திலகம் சிவாஜியால் வழங்கப்பட்டது.

அந்த யானையை பராமரிக்க முடியாத நிலையில் கோவில் நிர்வாகம் சிவாஜியிடம் எங்கள் கோவில் வருமானத்தில் யானைக்கு தீனி போட

முடியவில்லை வேறு கோவிலுக்கு யானையை கொடுத்து விடுங்கள்

என்று கூறினார்களாம்.

அதற்கு நடிகர் திலகம் நாளை வாருங்கள் பதில் சொல்கிறேன் என்று கூறினாராம் ஒரு வாரம் வரை பதில் வராத காரணத்தால் கோவில் நிர்வாகம் மீண்டும் நடிகர் திலகத்தை காண சென்ற போது அவர் சொன்ன வார்த்தை நிர்வாகத்திற்கு அதிர்ச்சி அளித்தது என்னவென்றால் கோவிலுக்கு அருகே இரண்டு ஏக்கர் நிலம் வாங்கி உள்ளதாகவும் அந்த விளை நிலத்தில் பயிர் செய்து வரும் வருமானத்தில் கோவிலுக்கும் யானைக்கும் யானைப் பாகனுக்கும் விவசாயிக்கும் கொடுக்க ஏற்பாடு செய்து உள்ளதாகவும் யானைப் பாகனுக்கும் விவசாயிக்கும் வீடு ஒன்று அமைத்துத் தருவதாகவும் கூறி அதிர்ச்சி அளித்தார் நடிகர் திலகம் ...

இன்று வரை நடந்துக் கொண்டு இருக்கிறது அந்த யானை இறந்த பிறகு மீண்டும் ஒரு யானையை வாங்கி கொடுத்துள்ளார் ..

இளைய திலகம் பிரபு அவர்கள் கோவிலுக்கு சமீபத்தில் சென்ற போது யானைப் பாகன் சொன்னார் ..  கஜ தானம் (யானை தானம்) செய்வது

நாடு செழிப்புடன் எந்தவித பஞ்சம் இல்லாமல் மக்கள் வாழ செய்யும்

தானம் ஆகும் ...

இது போல் கோவில்களுக்கு ஆறு யானை வாங்கிக் கொடுத்து உள்ளார் நடிகர் திலகம் என்பது குறிப்பிடத்தக்கது .

.

சினிமாவில் மட்டுமல்ல நிஜத்திலும் கர்ணன் போல் வாழ்ந்துள்ளார்

பேஸ்புக்கிலிருந்து......

========================================================================================

இதை இலக்கிய பக்கமாகவும் எடுத்துக் கொள்ளலாம், கவிதைப் பக்கமாகவும் எடுத்துக் கொள்ளலாம்! - படித்ததன் பகிர்வு.

\\\\வி ரா ராஜகோபாலன் நல்ல கவிஞர்.  கதைகளும் நாடகமும் எழுதும் ஆற்றல் உடையவர்.  பழம் தமிழ் இலக்கிய ஞானம் பெற்றிருந்தவர்.  மணிமேகலையின் கதையை சுயசரிதையாக மணிமேகலையே கூறுவது போல உரைநடையில் தொடர்ந்து எழுதி வந்த அவர், ஒவ்வொரு இதழிலும் 'சங்க இலக்கியத்திலிருந்து'  என்று, பாடல்களின் பொருளை வசனப்படுத்தியும் கொடுத்து வந்தார். லட்சிய வேகம் பெற்றிருந்த நண்பர் தமக்கு குற்றம் என்று தோன்றியதை, அது எவர் செய்ததாக இருந்தாலும், அஞ்சாது கண்டிக்கும் மெய்த் துணிவும் பெற்றிருந்தார்.  அவரது இந்தப் பண்பை கலாமோகினி அடிக்கடி எடுத்துக்காட்டியது.

அந்நாட்களில் ரசிகமணி டி கே சி அவர்கள் கம்பன் பாடல்களை திருத்தி பத்திரிகைகளில் வெளியிட்டு வந்த போதும், திருத்தம் பெற்ற பாடல்களை 'கம்பர் தரும் ராமாயணம்' என்று புத்தகமாக பிரசுரித்த போதும் ஆதரவும் வரவேற்பும் இருந்தது போலவே எதிர்ப்பும் கண்டனங்களும் கிளம்பி கொண்டிருந்தன.  டி கே சி அவர்களின் செயலை 'சாலிவாஹனனு'ம் எதிர்த்து கண்டித்தார். 

'சாலிவாஹனன்' எழுத்தில் உண்மையின் வேகத்தோடு பரிகாசமும், நளினமான நகைச்சுவையும் கலந்து மிளிரும்.  அத் தன்மையிலே 'ஐந்தாம் படை ரசிகர்கள்' என்று ஒரு கட்டுரை எழுதினார் அவர்.

'ஐந்தாம் படை வேலை' என்பது யுத்த காலத்தில் வழக்கில் அடிபட்ட ஒரு சொல்.

ஒரு குறிப்பிட்ட காரியத்திற்கு உதவி செய்பவர்களை போல் நடித்துக் கொண்டு, அதே காரியத்திற்கு பாதகமான செயல்களை செய்வதைத்தான் ஐந்தாம் படை வேலை என்கிறோம். 'இப்போது" என்று கட்டுரையை ஆரம்பித்து டி கே சி அவர்களும் அவர்களது ரசிகர்களும் செய்து வருவது இலக்கிய நாச வேலையே தான் என்று கண்டித்து இருந்ததோடு, முத்தாய்ப்பாக கவிதையும் எழுதி தீர்த்தார் சாலிவாஹனன். - 

கொங்குகரை யற்ற சுவைக் கம்பன் பாட்டை 

கழித்தொழித்துக்  கூட்டித்  தம் கசப்பைச் சேர்த்து 

தங்களிடம் உள்ள பெரும் புன்மை புத்தி 

தான்தோன்றித்தனம் செருக்கு எல்லாம் தோன்ற 

"இங்கை தான் கம்பனுடைய கனிந்த பாடல் 

இவற்றையவன் இவ்வாறே பாடக்  கேட்டோம் 

எங்களுக்கே தெரியுமவன் கவிதைப் பண்பு!" 

என உரைத்துத் திரிகிறதோர் விஷமக் கூட்டம் 

பொங்கு புகழ்க் கோசலையின் செல்வன் கானம் 

போவதற்குக் கைகேசி புரிந்த தீமை 

இங்கிந்தக் கைகேசி முதலோர் கும்பல் 

இனிய சுவைக் கம்பனுக்கே சூழ்கின்றார்கள்; 

மயங்கிவிட்ட  கொஞ்சநஞ்சம் மறம்கொண்டேனும் 

மாபாவச் செயலிதனை மடக்காவிட்டால் 

சிங்கமென சிவன் தனையே எதிர்த்த கீரன் 

சீர் மிகுந்த தமிழ்ப் பெருமை அழிந்தே போகும் 

பாவமிது கலைப்பண்பு ரஜனை யென்று 

பாவனைகள் நிதம் செய்து நடிக்கும் இந்த 

காவியத்தின் கடும் பகைவர் கூட்டந்தன்னை 

கடிதினிலே களையவே களையாவிட்டால் 

பாவினிலே கொஞ்ச நஞ்சம் இரக்கம் உள்ள 

பரமார்த்தத் திருக்கூட்டம் ஒன்றைத் தங்கள் 

காவலெனக் கொண்டு நிதம் கடையர் செய்யும் 

காவியத்தின் கடுங் கொலைகள் சகிக்கொணாது. 

இதற்கு எதிர்ப்புகள் வந்தபோது கலாமோகினியில்,  'அம்பலம்' என்றொரு பகுதி துவக்கப்பட்டது.  அதில் பதில் கூறும் போது,  இந்த வியவகாரம் எந்த விதத்திலும் தனிமனிதர் சம்மந்தப்பட்டதே இல்லை.  அதற்கு மாறாக நிரந்தர இலக்கியங்களைப்  பாதுகாப்பதில் கையாளப்பட்டு வரும் முறைகளில் நமக்குள்ள அபிப்பிராய பேதங்களே காரணமாகும்' என்று எழுதி விளக்கம் அறிவித்த சாலிவாஹனன்,  'நக்கீரருக்கு' என்ற ஒரு அருமையான கவிதையும் தீட்டினார். 

பொங்கு கனல்சின விழியைச்  சினந்த கீர ! 

பொழுதினிலே நீ உயிரோடு இருத்தல் வேண்டும். 

இங்கு பலகீரர்கட்க்கு இந்த நாட்டில் 

ஈடெடுப்பே யற்றதொரு தேவையின்று. 

சிங்கமென துணியுமுங்கள் தீர்த்த கேள்வி 

சீர் மிகுந்த கலையுணர்வும் தீர்ந்து எங்கும் 

பொங்கு மிருள் மலிந்து தமிழ் கவியை மூடப் 

பொய் கலைகள் பொதி பொதியாய் மலிந்ததின்று 

எங்களையின் நிலையினின்றும்  ஏற்றற காக 

ஏதமற்ற மெய்த் துணிவை தருவதற்காக 

மங்குகின்ற மாகவிதை காத்தற்காக 

மாசறுநல் லிலக்கியங்கள் நிலைத்ததற்காக

சங்கமற்ற இழிந்த நிலை மறைதற்காக 

சார்ந்த பல திரிசமங்கள் போக்கற்காக 

பங்கமற்ற பவித்திரராம் உன்னைப் போன்றோர் 

பாழடைந்த தமிழகத்தில் உதித்தல் வேண்டும் 

டி கே சி அவர்களின் ராமாயணத்தை 'இமிடேஷன் இலக்கியம்' என்று குறிப்பிட்டு சாலிவாஹன்ன் தொடர்ந்து இரண்டு கட்டுரைகள் எழுதினார். 

'யாப்பில்லாக் கவிதை'யை எதிர்த்தவர்களுக்கு மறுப்புரையாக ஒரு சமயம் 'க்‌ஷேமலாபங்கள்' பகுதிகள் வேகமாக கவிதை ஒன்றை அவர் வெளியிட்டதும், கவிஞர் பாரதிதாசன்  கலாமோகினிக்கு கவிதை தர மறுத்ததனால் சீற்றம் கொண்டு, அவரை 'நமது அதிதி' யாக்கி காரசாரமான கவிதை ஒன்று படைத்தளித்ததும் இப்ப பத்திரிகையின் வரலாற்றில் முக்கியமானவை தான்.

- கலாமோகினி.... -

==================================================================================================

நியூஸ் ரூம் 

-  ‛சிலை கடத்தல் கோப்புகள் மாயமானது எப்படி? தமிழக அரசின் செயல் அதிர்ச்சி அளிக்கிறது!': உச்ச நீதிமன்றம்.  புதுடில்லி: தமிழகத்தில், 300 கோடி ரூபாய் மதிப்பிலான சிலை கடத்தல் வழக்கு தொடர்பான கோப்புகள் மாயமான விவகாரத்தில், தமிழக உள்துறை செயலாளர் ஆஜராகி விளக்கம் அளிக்க உச்ச நீதிமன்றம் உத்தரவிட்டுள்ளது.

-  ஜப்பானின் கெய்ரோஸ் ராக்கெட் திட்டம் தோல்வி; ஏவிய சில நிமிடங்களில் வெடித்து சிதறியது!

-  வாஷிங்டன்: சர்வதேச விண்வெளி நிலையத்திலிருந்து விண்வெளி வீரர் சுனிதா வில்லியம்ஸ் பூமிக்கு திரும்பும் பயணம் மேலும் ஒரு மாதம் தாமதமாகும் என நாசா தெரிவித்துள்ளது.

-  லக்னோ: உத்தரபிரதேசத்தில் 150 ஆண்டுகள் பழமையான படிக்கிணறு இருப்பதை தொல்லியல் துறையினர் கண்டுபிடித்துள்ளனர்.

- சென்னை: சாத்தனுார் அணை மற்றும் முதலை பண்ணையில் இருந்து பெண்ணையாற்றில், 150க்கும் மேற்பட்ட முதலைகள் வெளியேறியதாக அதிர்ச்சி தகவல் வெளியாகி உள்ளது.  சாத்தனுாரில் இருந்து முதலைகள் அதிக அளவில் வெளியேறிய நிலையில், அந்த தகவலை நீர்வளத்துறை மற்றும் வனத்துறையினர் மூடி மறைத்ததாக புகார் எழுந்து உள்ளது.

-  பிரபல பாடகர் அபிஜித் பட்டாச்சாரியார் மகாத்மா காந்தி குறித்து சர்ச்சையான கருத்தை தெரிவித்துள்ளார்.  "மகாத்மா காந்தி பாகிஸ்தானின் தேசத்தந்தை. இந்தியாவிற்கு அல்ல.  இந்தியா முன்பிருந்து இங்கு இருக்கிறது. ஆனால் பாகிஸ்தான் இந்தியாவிலிருந்து பிரிக்கப்பட்டது. காந்தியை தவறுதலாக இந்தியாவின் தேச தந்தை என அழைக்கிறோம். அவர் பாகிஸ்தானின் இருப்புக்கு காரணமானவர்.' என்று பேசியுள்ளார் இது சர்ச்சையாகி இருக்கிறது

-  சமீபத்தில் சையது மோடி சர்வதேச பாட்மின்டனில் சாம்பியன் பட்டம் வென்ற சிந்து, ஐதராபாத்தை சேர்ந்த வெங்கட தத்தா சாய் என்பவரை திருமணம் செய்து கொண்டார். இவர்களது திருமணம் ராஜஸ்தானின் உதய்பூரில் கோலாகலமாக நடந்தது. இதில் நெருங்கிய குடும்பத்தினர், நண்பர்கள் மட்டும் கலந்து கொண்டனர்.

-  புவனேஸ்வர்: 'சீட்டு நிறுவன மோசடியில் நானும் பாதிக்கப்பட்டேன். பணத்தை திரும்பப் பெற முடியவில்லை,' என்று ஒடிசா முதல்வர் மோகன் சரண் மாஜி கூறினார்.

-  புதுடில்லி அறிமுகமில்லாத சர்வதேச அழைப்புகள் குறித்து பொதுமக்கள் எச்சரிக்கையாக இருக்கும்படி, தொலைத்தொடர்புத் துறை அறிவுறுத்தியுள்ளது. அதுபோன்ற அழைப்புகள் வந்தால், தொலைபேசி நிறுவனங்கள் வாடிக்கையாளர்களுக்கு விழிப்புணர்வு ஏற்படுத்தவும் உத்தரவிட்டுள்ளது.  தங்கள் தந்திரத்தை மாற்றிய மோசடிக்காரர்கள், சர்வதேச எண்களிலேயே அழைக்கத் துவங்கி விட்டனர். எனவே, இந்திய தொலைபேசிக் குறியீடான +91 என்பதில் துவங்காத, முன்பின் தெரியாத சர்வதேச குறியீடுடன் துவங்கும் எண்ணில் இருந்து அழைப்புகள் வந்தால், எச்சரிக்கையுடன் இருக்க வேண்டும்.

-  சூரியனை ஆய்வு செய்வதற்காக அமெரிக்கா விண்வெளி ஆய்வு மையமான நாசா அனுப்பியுள்ள பார்க்க விண்கலம் புதன்கிழமை அதிகாலை 6 53 மணிக்கு இந்திய நேரப்படி மாலை 5:23 மணிக்கு  இதுவரை இல்லாத மிக நெருக்கத்தில் கடக்க இருக்கிறது சூரியனிலிருந்து 38 லட்சம் கிலோ மீட்டர் தொலைவில் தான் அந்த விண்கலம் கடக்கும் என்றாலும் மனிதர்களால் உருவாக்கப்பட்ட ஒரு பொருள் சூரியனை அந்த அளவுக்கு நெருங்குவது இதுவே முதல்முறை என்பது குறிப்பிடத்தக்கது.

-  புதுடில்லி : பிரபல எழுத்தாளர் சல்மான் ருஷ்டியின் தடை செய்யப்பட்ட 'தி சாத்தானிக் வெர்சஸ்' என்ற சர்ச்சை புத்தகம் 36 ஆண்டுகளுக்கு பின் இந்தியாவில் விற்பனைக்கு வர உள்ள தகவல் வெளியாகியுள்ளது.  இந்தியாவில் சர்ச்சை புத்தகத்திற்கு கடந்த 1988-ம் ஆண்டு அப்போதைய ராஜிவ் பிரதமராக இருந்த போது விற்பனைக்கு தடை விதிக்கப்பட்டது.  இந்நிலையில் சர்ச்சைக்குரிய வாசகங்கள் நீக்கப்பட்டு 36 ஆண்டுகளுக்கு பின் ‛தி சாத்தானிக் வெர்சஸ் புத்தகம் இந்தியாவில் ரூ. 1999 என்ற விலையில் விற்பனைக்கு அனுமதிக்கப்பட்டுள்ளதாகவும், குறைந்த அளவே அச்சிடப்பட்டு வெளியிட திட்டமிட்டுள்ளதாக பஹரிஸன் புத்தக விற்பனை நிலைய உரிமையாளர் ரஜினி மல்ஹோத்ரா ‛எக்ஸ்' வலைதளத்தில் பதிவேற்றி அறிவிப்பு வெளியிட்டுள்ளார்.

-  கோழிக்கோடு: பிரபல மலையாள சினிமா கதாசிரியர், இயக்குனர் எம்.டி. வாசுதேவ நாயர் ,91 உடல் நலக்குறைவால் சிகிச்சை பலனின்றி காலமானார்.

========================================================================================================

பொ க் கி ஷ ம்  :

இவர் யார் என்று தெரிகிறதா?  இவரைப்பற்றி சில சுவாரஸ்ய தகவல்களை இவர் உறவினர் திரு விஸ்வநாதன் சொல்லி பிரசுரிக்கப்பட்டுள்ளது.  அதைப் பகிர விருப்பம்.