"திங்க"க்கிழமை : ஷாஹி துக்கடா - மனோ சாமிநாதன் ரெஸிப்பி

 ஷாஹி துக்கடா

பிரெட், பால், சர்க்கரை, நெய் கலந்த வட இந்திய இனிப்பு இது!! மொகலாய அரசவைகளில் இது பரிமாறப்பட்டதால் royal bite என்ற பொருள் கொண்ட SHAHI THUKDE என்று அழைக்கப்பட்டது.. iஉத்தரப்பிரதேஷ் மாநிலத்தின் பிரபலமான இனிப்பு என்றாலும் மொகலாய அரசர் பாபரால் இந்தியாவிற்குள் கொண்டுவரப்பட்டது என்று சொல்லப்பட்டாலும் ஹைதராபாத் மாநிலத்திலும் பாகிஸ்தான் நாட்டிலும் முக்கியமான தருணங்களில் இந்த இனிப்பு செய்து கொண்டாடுகிறார்கள். இதை இங்கே அதிகமாக யாரும் செய்வதில்லை. ஆனால் இப்போது தமிழ் நாட்டிலும் இந்த இனிப்பு பரவி விட்டது. ஆனாலும் ஐந்து நட்சத்திர ஹோட்டல்களில் கூட இதை முறையாக செய்வதில்லை. கவனமாக செய்து விட்டால் இதைப்போல் சுவையான இனிப்பு வேறெதுவும் இல்லை. இப்போது செய்முறைக்கு போகலாம்!!

தேவை;

பிரெட் ஸ்லைஸ்கள்-6

பால்- 1 லிட்டர்

ஏலப்பொடி- 1 ஸ்பூன்

குங்குமப்பூ எஸ்ஸென்ஸ்- சில துளிகள்

குங்குமப்பூ- அரை ஸ்பூன்

சீனி-300 கிராம்

நெய்- 200 கிராம்

பொடியாக நறுக்கிய பிஸ்தா பருப்பு துகள்கள்-2 மேசைக்கரண்டி

செய்முறை:

பிரெட் துண்டுகளை ஓரங்கள் நறுக்கி பின் குறுக்காக நறுக்கி வைக்கவும்.

ஒரு அகன்ற குழியான தோசைக்கல்லில் ஓரளவு நெய் ஊற்றி சில பிரெட் துண்டுகளை போட்டு இரு புறமும் பொன்னிறமாக பொரித்து எடுக்கவும். இது போல நெய் ஊற்றி ஊற்றி எல்லா பிரெட் துண்டுகளையும் பொன்னிறமாக வறுத்து வைக்கவும்.

கண்டென்ஸ்ட் மில்க் போல கெட்டியாக அரை லிட்டர் பாலை சுண்டக்காய்ச்சவும்..

அதில் ஏலப்பொடியும் சில துளிகள் குங்குமப்பூ எஸ்ஸென்ஸையும் கலந்து வைக்கவும்.

சீனியை கம்பிப்பாகு காய்ச்சவும்.

பாக்கியுள்ள அரை லிட்டர் பாலை குங்குமப்பூ சேர்த்து 10 நிமிடங்கள் காய்ச்சி ஓரளவு சுண்டியதும் சில துளிகள் குங்குமப்பூ எஸ்ஸென்ஸ் சேர்த்து சூடாக வைத்திருக்கவும்.

உயரம் குறைவான ஒரு அகன்ற மைக்ரோவேவ் கண்ணாடி பாத்திரத்தில் பிரெட் துண்டுகளை நன்கு பொருந்துமாறு அடுக்கி வைக்கவும்.

பிறகு அதில் குங்குமப்பூ பாலை பரவலாக ஊற்றி சில நிமிடங்கள் HIGHல் மைக்ரோவேவ் செய்யவும். பாலை முழுவதுமாக பிரெட் துண்டுகள் உறிஞ்சிக்கொள்ளும் வரை இடைவெளி விட்டு விட்டு சூடாக்கவும்.

இதற்கு மைக்ரோவேவ் அவனில் கிட்டத்தட்ட 5 நிமிடங்கள் HIGHல் வைகக் வேண்டியிருக்கும்.

இப்போது பிரெட் மீது பரவலாக சீனிப்பாகை ஊற்றி 5 முதல் 6 நிமிடங்கள் வரை பிரெட் பாகை முழுவதுமாக உரிஞ்ச HIGHல் வைத்து சமைக்கவும். சில சமயம் மேலே பிரவுன் கலராக மாறினால் ஒரு தோசை திருப்பியால் பிரெட் துண்டுகளை திருப்பிப்போட்டு சமைக்கவும்.

இப்போது வெளியே எடுத்து கெட்டியான பாலை பரவலாக சமமாக ஊற்றி பிஸ்தா துகள்களைத்தூவி மீண்டும் உள்ளே வைத்து HIGHல் ஒரு நிமிடம் சமைக்கவும்.

ஆறிய பிறகு துண்டுகள் செய்யவும்.

சுவையான ஷாஹி துக்கடா தயார்!!