கூட்டுத்தொகை ஒன்பது

 திடீரென்று சில பழக்கங்களை நாம் ஏற்படுத்திக் கொள்வோம் தெரியுமா...  

சிறு வயதில் சபரிமலைக்கு மாலை போட்டவர்களைக் கண்டால் நானும் என் சகோதரியும் வாய் விட்டு 'சாமியே சரணம் ஐயப்பா' என்று சொல்வோம்.  சிலமுறை அவர்கள் காதில் அது பட்டு அவர்களும் பதில் சொல்வதைக் கேட்டு கூச்சப்பட்டு, எங்களுக்கு மட்டும் கேட்கும் வண்ணம் 'சாமியே சரணம் ஐயப்பா' என்று மூன்று முறை சொல்வோம்.  புண்ணியம் அதிகமாக கிடைக்கும் என்று ஒருமுறை என்பதை மூன்று முறை என்று ஆக்கியிருந்தோம்.

ஐயப்ப பூஜைகளில் அவர்களின் சரண கோஷம் கேட்டு அவர்கள் போல நாங்களும் ஸ்வாமியின் நாமத்தைச் சொல்ல வேண்டும் என்றே அப்படிச் செய்தோம்.  ஒரு கட்டத்தில் இன்று எவ்வளவு மாலை அணிந்தவர்களைப் பார்த்தோம் என்று போட்டி ஏற்பட்டது.  சில சமயங்களில் அங்கு இருந்த சூழலில் சொல்ல முடியவில்லை.  கூட்டமாக நான்கைந்து பேர்களை பார்த்தோம் என்று சொல்லி வீட்டுக்கு வந்து ஐந்து என்றால் ஐந்து X  மூன்று, 15 முறை சொல்வோம்.

வயது ஏற ஏற மெல்ல அந்தப் பழக்கம் குறைந்தாலும் அப்படி நிறுத்துவது பெரிய தெய்வ குற்றம்போல் மனதில் பட்டு நிறுத்துவதற்கு கொஞ்ச காலம் சிரமப்பட்டோம்.

இப்போதும் மாலை அணிந்தவர்களைப் பார்த்தால் சட்டென இந்த வழக்கம் மனதில் வந்துபோகும்.  'ஸ்வாமியே சரணம் ஐயப்பா' என்று மனதுக்குள் வாசகம் ஓடும்.

அதுபோல,

என் பதின்ம வயதுகளில் யாரோ சொன்னார்கள், வாகனங்களுக்கு இருக்கும் பதிவு எண்ணின் கூட்டுத்தொகை ஒன்பது என்று இருந்தால் விசேஷம்.  காசு அதிகம் கொடுத்தாவது அப்படி அமைவதுபோல் பார்த்து பார்த்துதான் வாங்குவார்கள் என்று சொன்னார்கள்.  

இதில் என்ன நம்பரை எப்படி கூட்டுவீர்கள்!

அவ்வளவுதான்...

சாலையில் தாண்டிச் செல்லும் வாகனங்களை எல்லாம் ஆராய்ந்து பதிவு எண்ணின் கூட்டுத் தொகையை பார்ப்பது வழக்கமானது.  காலங்கள் செல்லச் செல்ல நடுநடுவில் அது குறைந்தாலும், இன்றும் சாலையில் வாகனங்களின் எண்ணைக் கண்கள் பார்த்ததும் மனம் கூட்டத் தொடங்கிவிடும்!  சமயங்களில் வரிசையாக தாண்டிச் செல்லும் வாகனங்களின் கூட்டுத்தொகை எதிர்பாராமல் ஒரே எண்ணே வந்து ஆச்சரியப்படுத்தும்.

மனதுக்குள் அவ்வப்போது ஒரு அலுப்பும் தோன்றும்.  எனினும் இந்த பழக்கத்தையும் நிறுத்த முடியாமல் தொடர்வது இன்றும் வாடிக்கையாகி விட்டது.  அப்படி நிறுத்தினால் கைவிரல்கள் ஆடும்!  தாவாங்கட்டை வலிப்பது போல இருக்கும்.  மண்டைக்குள் விர்ரென்று இருக்கும்!!!  மனம் அடுத்த விஷயத்துக்கு நகராமல் ஏதோ அரியர் வைத்தது போல ஒரு இடத்தில தடுக்கி நின்று தவிக்கும்!

சொல்ல மறந்து விட்டேனே...

ஒன்பதாம் நம்பர் மட்டுமல்ல மூன்று கூட நல்ல எண் என்றார்கள்.  அப்புறம் ஒற்றைப்படை என் ஓகே என்றார்கள்.  அப்புறம் இரட்டைப்படை கூட ஓகே தான், ஆனால் எட்டு மட்டும் கூடாது என்றார்கள்.

கூட்டுத்தொகை பார்க்கும்போது இவை யாவும் மனதில் வந்து போகும்!

இதைப்பற்றிச் சொன்னபோது மருமகள் சொன்னாள், கல்லூரியில் படிக்கும்போது பஸ்ஸில் செல்கையில் எதிரில் எத்தனை வாகனங்கள் வருகின்றன தோழிகள் ஒவ்வொருவரும் என்று கணக்கெடுப்பார்களாம்.  போட்டி என்ன என்றால் ஒருவருக்கொருவர் சரிபார்க்கும்போது ஆட்டோ, எவ்வளவு, இருசக்கர வாகனம் எவ்வளவு, பஸ் எவ்வளவு லாரி எவ்வளவு என்று கணக்கு சொல்ல வேண்டுமாம்!

===========================================================================================

நியூஸ் ரூம்  - பானுமதி வெங்கடேஸ்வரன் 

-  ராய்ப்பூர்: உணவுக் கட்டுப்பாடு மற்றும் பாரம்பரிய சிகிச்சையால் புற்றுநோய் முற்றிலும் குணமடைந்து விட்டதாக கூறிய விவகாரத்தில், இந்திய கிரிக்கெட் அணியின் முன்னாள் வீரர் நவ்ஜோத் சிங் சித்து மனைவிக்கு ரூ.850 கோடி நோட்டீஸ் அனுப்பப்பட்டுள்ளது.

- குன்னுார்: மேட்டுப்பாளையத்தில் இருந்து, குன்னுாருக்கு, 6 லட்சம் ரூபாய் கட்டணம் செலுத்தி, மலை ரயிலை வெளிநாட்டு சுற்றுலா பயணிகள் வாடகைக்கு எடுத்து வந்தனர்.

- குரூப்1, 1 பி முதன்மைத் தேர்வை கருப்பு மை பேனாவில் மட்டுமே எழுத வேண்டும் எனவும்,  கருப்பு மை பேனாவை தவிர மற்ற  பேனாவை உபயோகித்தால் அந்த விடைத்தாள்  செல்லாது என்றும் தமிழ்நாடு அரசு  பணியாளர் தேர்வாணையம் அறிவிப்பு.

-  சென்னை: வாடகைத்தாயாக இருந்து குழந்தை பெற்றுத் தருவதாக கூறி, கலவையைச் சேர்ந்த தம்பதியிடம் ரூ. ஐந்து லட்சம் தர வேண்டும் என்று பேசி முடித்த மஞ்சு என்னும் பெண் தரகரும் அதற்கு உடன்பட்ட பெண்ணும் கைது செய்யப்பட்டிருக்கின்றனர்.

-  பெங்களூரு: பெண் தொழிலதிபரை விசாரணையின்பொழுது ஆடையைக் களைந்து அவமதித்ததால் அந்த பெண் தொழிலதிபர் தற்கொலை செய்து கொண்டார். சம்பந்தப்பட்ட காவல்துறை அதிகாரி மீது நடவடிக்கை. 

-  நியூபோர்ட், இங்கிலாந்து: ஹேவல்ஸ் என்பவர் 2009 ஆம் ஆண்டு 8000 பிட்காயின்களை வாங்கி தன்னுடைய அப்போதய காதலி வீட்டில் வைத்திருக்கிறார். காதலியை பிரிந்த அவர் தான் பிட் காயின்கள் வாங்கியதை மறந்தும் போய்விட்டார். அவற்றின் இன்றைய மதிப்பு 569 மில்லியன் பவுண்ட் (இந்திய மதிப்பில் ₹5900 கோடி). அந்த பிட் காயின்களை முன்னாள் காதலியிடமிருந்து திரும்ப பெற அவரை அணுகிய பொழுதுதான் அவள் வீட்டை ஒழிக்கும் பொழுது பிட்காயின்கள் மற்றும் அதன் டிஜிட்டல் கீ அடங்கிய ஹார்ட் டிஸ்கையும் குப்பையில் வீசியது தெரிய வந்திருக்கிறது. குப்பையைக் கிளறி தன் ஹார்ட் டிஸ்கை தேடித்தரும்படி அந்த ஊர் முனிசிபாலிடியை நாடியுள்ளார், அவர்கள் கை விரிக்க கோர்டில் விண்ணப்பித்திருக்கிறார். 

-  ஒரு வங்கி கணக்கிற்கு நான்கு நாமினிகளை நியமிக்கலாம். புதிய சட்டம் மக்களவையில் நிறைவேறியது. 

பிறக்கும்போதே பறக்க அனுமதி...

-  திருவனந்தபுரம்: கேரள காங்கிரஸ் எம்.பி., சசி தரூரின் மடியில் வந்து அமர்ந்து குரங்கு ஒன்று, வாழைப்பழத்தை சாப்பிட்டு, அவரது மடியிலேயே குட்டித் தூக்கம் போட்ட நிகழ்வு சமூகவலைதளங்களில் வைரலாகி வருகிறது.

- கோல்கட்டா: மேற்கு வங்க மாநிலத்தில் ஆயுள் தண்டனை பெற்று சிறையில் இருந்த 104 வயது முதியவருக்கு கருணை அடிப்படையில் சுப்ரீம் கோர்ட் இடைக்கால ஜாமின் வழங்கி உள்ளது.

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

மறுபடியும் RV யின் 'சிலிக்கான் ஷெல்ப்' பக்கத்திலிருந்து...

கல்கிக்கும் புதுமைப்பித்தனுக்கும் ஒரு காலத்தில் குடுமிப்பிடி சண்டை நடந்திருக்கிறது.

கல்கி விகடனை விட்டு விலகி கல்கி பத்திரிகையை ஆரம்பித்திருந்த தருணம். எஸ்.எஸ். வாசன் எடுத்த மங்கம்மா சபதம் திரைப்படத்தை கல்கி கன்னாபின்னா என்று தாக்கி இருந்தாராம். அது ஒரு ஆபாசக் கதை என்பதுதான் அவர் விமர்சனத்தின் சாரம். (ஒரு ஆபாசமும் இல்லை, ஆனால் மோசமான திரைப்படம் என்பது என் கருத்து) புதுமைப்பித்தன் இதில் ஒரு ஆபாசமும் இல்லை, உமக்கு ரசனை இல்லை என்று திருப்பித் தாக்கி இருக்கிறார்.

அப்போது கல்கி காப்பி அடித்து எழுதியவை என்று ஒரு பட்டியல் போட்டிருக்கிறார். புதுமைப்பித்தனின் முக்கிய விமர்சனம் கல்கி அவற்றை தழுவல் என்று சொல்லாமல் காப்பி அடித்திருக்கிறார் என்பதுதான். சரிதானே! ஆனால் இந்த சண்டையின் போது கல்கி தான் ஒரு ஏழெட்டு சிறுகதைகளை தர்ஜுமா செய்து எழுதி இருக்கிறேன் என்பதை ஒப்புக் கொண்டிருக்கிறார். புதுமைப்பித்தனோ நீர் எழுதிய எல்லாமே அப்படித்தான் என்று ஒரு அடி அடித்திருக்கிறார்!

என்னைப் பொறுத்த வரையில் தழுவலில் ஒரு தவறுமில்லை. ஆனால் மூலத்திற்கு குறைந்தபட்ச அங்கீகாரமாவது தரப்பட வேண்டும்.

இந்த மாதிரி வம்பு என்றால் எனக்கு அல்வா சாப்பிடுவது போலத்தான். அதனால் புதுமைப்பித்தன் போட்ட பட்டியல் கீழே.

• சாரதையின் தந்திரம் சிறுகதைத் தொகுப்பு - இதில் உள்ள பெரும்பாலான சிறுகதைகள் சிசிர் குமார் கோஷ் எழுதிய "Glimpses of Indian Life"  தொகுப்பில் உள்ளவற்றைத் தழுவியதாம்.
• புது ஓவர்சீயர் சிறுகதை - இது பிரேம்சந்தின் நமக் கா டரோகா சிறுகதையின் அப்பட்டமான காப்பி. (நான் இரண்டையும் படித்திருக்கிறேன். மோசமாக காப்பி அடித்திருக்கிறார், பிரேம்சந்தின் அருகே கூட வரமுடியவில்லை.)
• காங்கிரஸ் ஸ்பெஷலில் கோர சம்பவம் - இது மார்க் ட்வெய்னின் Cannibalism in the Cars சிறுகதையின் அப்பட்டமான காப்பி. (மூலமும் சரி, தழுவலும் சரி, என்னைக் கவரவில்லை.)
• ஏட்டிக்குப் போட்டி - இதில் பல கட்டுரைகள் ஜெரோம் கே. ஜெரோமின் Three Men in a Boat புத்தகத்திலிருந்து சுட்டவையாம்.
• வீணை பவானி - பால்சாக்கின் Opera Singer சிறுகதையின் தழுவலாம்

புதுமைப்பித்தனால் இவ்வளவுதான் சொல்ல முடிகிறது என்றால் அது கல்கியின் output-இல் ஒரு சிறு பகுதிதான். அதே நேரத்தில் ஏட்டிக்குப் போட்டியால்தான் அவரால் விகடனில் நுழைய முடிந்தது, அவரது வெற்றிக்கு முதல் படி அதுதான். கல்கியை நான் நல்ல எழுத்தாளர் என்பதை விட நல்ல பத்திரிகையாளர் என்றே மதிப்பிடுகிறேன். என் கண்ணில் பொ. செல்வனும் சில பல கட்டுரைகளும் மட்டுமே அவரது எழுத்தில் கால வெள்ளத்தில் நிற்கும். சி. சபதம், பா. கனவு, அலை ஓசை எல்லாம் வெளியான காலத்தில் வெற்றி பெற்றவைதான், ஆனால் அவை எல்லாம் எதிர்காலத்தில் மறக்கப்படும் என்றுதான் தோன்றுகிறது. புதுமைப்பித்தன்? நவீனத் தமிழின் முதல் மேதை எழுத்தாளர், என்றும் அழியாத சிறுகதைகளை எழுதினார்...

புதுமைப்பித்தனே சுப்பையா பிள்ளையின் காதல்கள் சிறுகதையை வால்டர் மிட்டியை தழுவி எழுதி இருக்கலாம். இரண்டுமே சாதனைகள்தான், ஆனால் புதுமைப்பித்தன் அனாயாசமாக ஜேம்ஸ் தர்பரை தாண்டி செல்கிறார். மேதை!

தொகுக்கப்பட்ட பக்கம்: கல்கி பக்கம், புதுமைப்பித்தன் பக்கம்

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

இந்த விடியோவை எத்தனைபேர் பார்த்தீர்கள்? பார்த்திருக்கிறீர்கள்?  நான் இங்கு வீடியோ இணைக்கவில்லை.   அவர் பாடும் அந்த வரிகளின் பொருள் ஒரு இடத்தில கொடுக்கப் பட்டிருந்தது.  அதைத்தான் ஷேர் செய்திருக்கிறேன்.

M āori மொழியில் "kamatee kamate hao" என்ற வார்த்தைகள் பாரம்பரிய போர் பாடலான ஹாகாவின் ஒரு பகுதியாகும். இந்த வாக்கியங்கள் நியூசிலாந்தின் மோரி கலாச்சாரத்தின் முக்கிய பகுதியான பிரபல ஹகா "கா மேட்" இருந்து எடுக்கப்பட்டவை. இந்த பாடல் M āori பழங்குடியின வீரர்களின் ஒற்றுமை, வலிமை, மற்றும் உற்சாகம் ஆகிய பாடலாகும். வெளிப்படுத்த பாடப்பட்டது.

"கா மேட்" என்பதன் பொருள் மற்றும் மொழிபெயர்ப்பு:

இந்த பாடலை அசலாக மாவோரி பழங்குடியின தலைவர் தே ராவுபராஹாவால் இயற்றப்பட்டது. அதன் சில ஆரம்ப வார்த்தைகளும் அதன் உருது மொழிபெயர்ப்பும் பின்வருமாறு:

கா மேட்! கா மேட்!

"நான் இறக்கிறேன்! " நான் இறக்கிறேன்! "

கா ஓரா! கா ஓரா!

"நான் உயிரோடு இருக்கிறேன்! நான் உயிரோடு இருக்கிறேன்! "

Tenei Te Tangata Puhuruhuru

"இதுதான் அந்த வலிமையான மனிதர்! "

Nana Nei I Tiki Mai Whakawhiti Te Ra

"சூரியனை மீண்டும் பிரகாசிக்க வைத்தவர் யார்! "

பயத்தையும் மரணத்தையும் வென்று உயிர் திரும்பிய உணர்வை வெளிப்படுத்தும் பாடல், போர்க்களத்தில் தைரியத்தை உயர்த்த பாடப்பட்டது.

ஆராய்ச்சி.

==================================================================================

சுஜாதாவின் முதல் கதை குமுதத்தில் அதிர்ச்சி அதிர்ச்சி என்ற பெயரில் வெளியானது. அதற்கு முன்னர் நண்பரின் கதை ஒன்றை திருத்தி அவர் பெயரில் அனுப்பி இருக்கும்போது அது வெளியாகிவிட்ட சந்தோஷம். ஆனால் அப்புறம் அவர் எழுதிய கதை பிரசுரமாக விட்டாலும் சலிக்காமல் தொடர்ந்த முயற்சியில் அதிர்ச்சி வெளியானது. 

இதுவரை அவற்றை சுஜாதா தொகுப்புகளில் பார்த்திருப்போமா என்பது சந்தேகம். இன்னொரு வேடிக்கை, இந்த சமயத்தில் நடந்த ஒரு வேடிக்கை சம்பவத்தையும் சொல்லுகிறார். 

வெகுஜன பத்திரிகைகளை சுஜாதா என்ற பெயரில் கதைகள் எழுதி வந்தவர் கணையாழியில் ஸ்ரீரங்கம் எஸ் ஆர் என்ற பெயரில் விமர்சன கட்டுரைகள் எழுதிக் கொண்டிருந்தார். ஆனால் வாசகர்களுக்கு இவர்தான் அவர், அவர்தான் இவர் என்று அப்போது தெரியாது. 

கணையாழியின் ஆசிரியர் கஸ்தூரி ரங்கன் சுஜாதாவின் நெருங்கிய நண்பர் என்பதால் சுஜாதாவுக்கு நிறைய சுதந்திரம்.  அந்நாளில் தனக்கான பகுதியில் சுஜாதாவையே கிண்டல் அடிப்பார்.  உதாரணத்திற்கு இரண்டு... சென்ற மூன்று இதழ்களில் சொந்த வேலையாய் கலிபோர்னியா வரை சென்றிருந்ததால் என்னால் இந்த பகுதிக்கு எழுத முடியவில்லை.  சுஜாதா என்கிறவரும் ஆண்டாளு அம்மாள் என்கிறவரும் இந்த பகுதியில் இடம் பெற்று இருக்கிறார்கள். முன்னவர் ஏதோ சிறுகதை எழுதுகிறவர். படித்ததில்லை. அடுத்தவரை தெரியாது என்று கிண்டல் அடித்திருக்கிறார். 

இதில் ஆண்டாளம்மாள் என்று நிஜமாகவே எழுதினார்களா என்றும் நமக்கு தெரியாது. இவர் அவ்வாறு பெயர் ஒன்றை சொல்கிறார். இதில் கலிபோர்னியா சுஜாதாவின் உட்டாலக்கடி சுஜாதாவை படித்ததில்லை என்பது இன்னும் குறும்பான உட்டாலக்கடி. 

இன்னொரு முறை சுஜாதாவை ஸ்ரீரங்கம் எஸ் ஆர் சந்திப்பது போல எழுதியிருக்கிறார். இந்த எழுத்தாளரை சமீபத்தில் நான் சந்தித்தபோது நடந்த சம்பாஷணையில் 'ஐ ஹேட் தி லாஸ்ட் வேர்ட்'. 

அறிமுகப்படுத்தியவர் :  'இவர் தான் ஸ்ரீரங்கம் எஸ் ஆர்' 

சுஜாதா :   'அப்படியா சந்தோஷம்' 

இவர் அறிமுகப்படுத்தியவர் மறுபடி :  'இவர்தான் கணையாழியில் நீர்க்குமிழிகள்; பெட்டி; கடைசி பக்கம் எல்லாம் எழுதுகிறவ.ர் .

சுஜாதா :  'அப்படியா நான் படித்ததில்லை' 

நான் :  'நானும் உங்கள் கதைகளை படித்ததில்லை' 

சுஜாதா :  யூ ஹேவண்ட் மிஸ்ட் மச் 

நான் :  பட் யூ ஹேவ். 

இதில் கணையாழியில் சுஜாதா நீர்க்குமிழி பட்டி என்று ஒன்று எழுதினாரா என்பதும் கவனிக்கப்பட வேண்டிய ஒன்று

==============================================================================

திரு காரைக்குடி நாராயணன் பேட்டியிலிருந்து...

கலைஞர்கள் மிகவும் உணர்ச்சி வசப்பட்டவர்கள்.  

அச்சாணி படத்தில் ;'இடம்பெற்ற 'மாதா உன் கோவிலில்' பாடல் வரிகளின் கனம் தாங்காமல் அதைப் பாட முடியாமல் எஸ் ஜானகி அழுதாராம்.  அவரை சமாதானப்படுத்தவே முடியவில்லையாம்.  தேற்றிக் கொண்டு வந்து பாட கொஞ்சம் நேரம் கேட்டாராம்.  

நேரம் இல்லை என்று சொல்லி பாட வைத்து எடுத்தார்களாம்.  அதுவும் இரண்டு பாடல்களை ஒரு மணி நேரத்தில்.  இது இளையராஜாவின் சாதனை.  

இதே பாடலின் காட்சியில் நடிக்கும் சமயம் லக்ஷ்மி இயக்குனர் சொல்லலித் தராத மூவ்மெண்ட் ஒன்றைக் கொடுத்தாராம், அதுவும் மறுபடி மறுபடி!  காரைக்குடி நாராயணன் லக்ஷ்மியை அழைத்துக் கேட்கும்போது 'தனக்கும் குழந்தை இல்லை (அந்த சமயம்)  கர்ப்பம் ஆனதும் கலைந்து போனது..  இந்த வரிகளில் எனது உணர்ச்சியையும் கலக்கிறேன்...  எனக்கும் ஒரு வழி பிறக்காதா' என்றாராம்.

===============================================================================================

==========================================================================================

பொக்கிஷம் 

இப்படி எல்லாம் பத்திரிகை வந்ததுங்க.....

இப்படி எல்லாம் சினிமா வந்ததுங்க....