இரட்டையாக ஒட்டிக்கொண்டிருக்கும் வாழைப்பழம் சாப்பிட்டால் இரட்டை குழந்தைகள் பிறக்கும் - சரியா ?

 

ஜெயக்குமார் சந்திரசேகரன் : 

​திரை நடிகர்களை நட்சத்திரம் (star, super star) என்று குறிப்பிடுவது ஏன்?

# கைக்கு எட்டாத தூரம், பார்ப்பதிலே ஆர்வம், எளிதில் மங்கிப் போகிற இயல்பு இது எல்லாமே நடிகர்களுக்கும் நட்சத்திரத்திற்கும் பொருத்தம்தானே.

​அச்சு புத்தகம், கிண்டில் புத்தகம் இரண்டில் எது வாசிப்பிற்கு சிறந்தது?

# கிண்டில் வாசிப்பு என் போன்ற மூத்தோருக்கு வசதியாக இருக்கிறது.

& எனக்கும் கிண்டில் பிடிக்கும். உட்கார்ந்தபடி, நின்றுகொண்டு, நடந்துகொண்டு, படுத்துக்கொண்டு கூட - அதிக பக்கங்கள் உள்ள புத்தகங்களை அலட்டிக்கொள்ளாமல் சுலபமாகப் படிக்கலாம்.   

மதவெறி மிகுந்தது ஏன்? அடுத்த உலகப்போர் மதத்தை முன் நிறுத்தி நடத்தப்படுமா?

# மத போதனைகளை சரிவர யாருமே கடைப்பிடிப்பது கிடையாது. ஆனால் மத நம்பிக்கைகளை முன்வைத்து கொள்ளை, கொலை, கலவரம்,  போர் எல்லாமே நடந்ததாக வரலாறு சொல்லுகிறது. இதற்கான நியாயங்கள், இதற்கான உண்மையான காரணங்கள் நம் அறிவுக்கு எட்டாதனவாகத்தான் இதுவரை இருக்கிறது. இதற்கு மேல் இது பற்றி விவாதித்தால் அது விபரீதத்தில் கொண்டு விடும்.

& 

கே. சக்ரபாணி சென்னை 28:

1. சில நாட்களில்  நாம்  காலையில்  எழுந்தது முதல்  அன்று  அடிக்கடி  ஒரேமாதிரியான  நிறமே அதிகம் கண்ணில் படும். 

. உதாரணமாக  சிகப்பு நிற கார்  சிகப்பு நிற ஆடை அணிந்தவர்கள்  என்று. இதுபோன்று தங்களுக்கு  ஏதேனும்  அனுபவம்  உண்டா? 

# ஒரே நிறம் அதிகம் கண்ணில் படும் என்பது சரியில்லையோ என்று தோன்றுகிறது.  நம் கவனம் அந்த ஒரு நிறத்தைக் கவனித்துப் பதிவு செய்து கொள்கிறது என்று இருக்கலாம்.  நாங்கள் இருக்கிற இடத்திலிருந்து பக்கத்திலுள்ள பெருவழிப் பாதையை எளிதாகப் பார்க்கலாம். அதில் ஒரு குறிப்பிட்ட மாதிரியான வண்டி சிவப்பு நிற மஞ்சள் பச்சை விளக்குகளை கொண்ட பெரிய லாரி என்று வைத்துக் கொள்ளுங்கள் அது ஒரு குறிப்பிட்ட சமயத்தில் அதிகமாக கண்ணில் படுவதாக எனக்குத் தோன்றும். அது உண்மையாகவும் இருக்கலாம்.

& நானும் அந்த வகையில் சில கவனிப்புகள் செய்தது உண்டு. நீங்கள் சொல்வது போலவே ஏதேனும் ஒரு நிறம் கண்ணில் பட்டால் - அதற்குப் பின் அதே நிற உடை அணிந்தவர்கள், அதே நிற கார்கள் போன்று கண்ணில் படும். ஆனால் ஒருவேளை நம்முடைய மனம் ஒரு நிறத்தைப் பிடித்துக்கொண்டுவிட்டால் அதற்குப் பின் மற்ற நிறங்கள் கண்ணில் பட்டாலும் அதை கண்டுகொள்ளாமல் விட்டுவிடுகிறதோ என்னும் சந்தேகமும் வருகிறது. 

இன்னொரு விஷயமும் ஞாபகம் வருகிறது. நான் சென்னை வந்த புதிதில், என் ஒன்றுவிட்ட சகோதரி கல்லூரியில் படித்துக்கொண்டிருந்தாள் - அவளுக்கு நெருங்கிய தோழிகள் இருவர். அவர்கள் மூவரும், முதல் நாளே தங்களுக்குள் பேசி வைத்துக்கொண்டு, மறுநாள் என்ன நிறத்தில் பாவாடை, சட்டை, தாவணி ( பாருங்க - அந்தக் காலத்தில் பா ச தா - உடை ! இந்தக் காலத்தில்??) அணிவது என்று தீர்மானம் செய்து அவ்வாறே அணிந்து கல்லூரி செல்வார்கள். இந்த மாதிரி தெருவில் செல்வோர் எல்லாம் மறுநாள் என்ன நிற உடை அணிவது என்று ரகசிய கூட்டறிக்கை தயார் செய்து அதன்படி உடை அணிவார்களோ! 

2. இரட்டையாக  ஒட்டிக்கொண்டிருக்கும்  வாழைப்பழம்  சாப்பிட்டால் இரட்டை குழந்தைகள்  பிறக்கும் என்று சொல்கிறார்களே  அதுபோன்று  தங்களுக்கு  தெரிந்து  யாருக்கேனும்  ஆகியிருக்கிறது என்று  கேள்விப்பட்டிருக்கிறீர்களா.

# ஒட்டியிருக்கும் வாழைப்பழம் பற்றிய நம்பிக்கையில் உண்மைக்கு வாய்ப்பே இல்லை.

& அப்படிப் பார்த்தால் நான் அசோக் லேலண்ட் காண்டீனில் இதுவரை சாப்பிட்ட இரட்டைப் பழங்களின் அடிப்படையில் எனக்கு குறைந்தபட்சம் 724 இரட்டைக் குழந்தைகள் பிறந்திருக்கவேண்டும்! 

இங்கே படத்தில் என்னுடன் இருக்கும் இரட்டைப் பையன்கள் எனக்கும், என் மனைவிக்கும் சொந்தம். மனைவியின் அத்தையின் (மாமியார் அல்ல) கொள்ளுப் பேரன்கள். இந்தப் பையன்களின்  அப்பாவுக்கு இரட்டைப் பழம் சாப்பிடும் வழக்கம் உண்டா என்று தெரியவில்லை! 

மேலும் ஒரு கொசுறு தகவல். 

என் அம்மாவுக்கு இரட்டைக் குழந்தைகள் பிறந்தன. 

என்னுடைய தங்கைக்கு இரட்டைக் குழந்தைகள் பிறந்தன. 

அந்த இரட்டைக் குழந்தைகளில் ஒருவருக்கு இரட்டைக் குழந்தைகள் பிறந்தன. 

ஆக, இரட்டைக் குழந்தைகள் குடும்ப ஜீன்ஸ் என்று மட்டும் சொல்லலாம். அம்மா, மகள், மகள் என்று தொடரலாம். 

என்னுடைய சித்தப்பா குடும்பத்தில், அண்ணனின் சம்பந்திக்கு இரட்டைப் பையன்கள். அந்த இரட்டைப் பையன்களில் ஒருவரை மணந்த அண்ணனின் பெண்ணுக்கு இரட்டைக் குழந்தைகள்!  

3. .சில வருடங்களுக்கு முன்  எல்லோர் வீட்டிலேயும் ஃபோல்டிங் சேர் என்று ஒன்று இருந்தது.  வேண்டும் போது போட்டுக்கொள்ளலாம் வேண்டாத போது மடக்கி ஓரமாக வைத்துவிடலாம். இப்போது அதை காணவில்லையே? 

# மடக்கு நாற்காலி இரும்பாலானது. நாளடைவில் துருப்பிடித்துப்  பயனற்றுப் போகும். அந்த துருப்பிடித்த காட்சி நினைவில் பசுமையாக இருப்பதால் அதை மீண்டும் வாங்க மறுக்கிறோம். இப்பொழுது வசதி வாய்ப்பு அதிகமானதால் மலிவான இரும்பு நாற்காலிக்கு மார்க்கெட் இல்லாமல் போய்விட்டது. (ஒரு காலத்தில் அதை வாங்குவதற்காக சீட்டுக் கட்டிப் பணம் சேர்த்த  ஆள் நான்.)

& எங்கள் வீட்டில் கூட நான்கு ஃபோல்டிங் சேர் இருந்தன. குறைந்த காலத்திலேயே துரு பிடித்து,  அங்கங்களை ஒவ்வொன்றாக இழந்து, காணாமல் போய்விட்டன. 

= = = = = = =

KGG பக்கம் :

= = = = = = = = 

வியாழக் கிழமைகளில், ஸ்ரீராம் அவருடைய நிகழ்கால அனுபவங்களை சுவையாகப் பதிவு செய்து வருவதைப் படித்ததும், எனக்கு, 'கடந்த கால அனுபவங்களை நான் எழுதினால் என்ன?' என்று தோன்றியது. 

அதன் விளைவுதான் புதன்கிழமை KGG பக்கம். 

அப்படி கடந்த கால அனுபவங்களை எழுதும்போது, அதை காலக் கிரமமாகப் பிரித்து எழுதுவது என்று தீர்மானித்தேன். 

கிட்டத்தட்ட என்னுடைய சுயசரிதை போன்ற ஒரு அமைப்பு என்று உருவகம் செய்து வைத்திருந்தேன். ஒரு வேடிக்கை என்ன என்றால், நான் ஜூனியர் டெக்னிகல் ஸ்கூல் படித்த காலத்திலேயே - (1965 - 68) என்னுடைய அனுபவங்களை பல வருடங்கள் கழித்து எழுதப் போகிறேன் என்று ஓர் உள்ளுணர்வு அடிக்கடி வந்து மனதில் ஆட்டம் போட்டுக்கொண்டு இருந்தது. 

அந்தக் காலத்தில், TV, mobile, internet, blog எதுவும் கிடையாது. அப்படி இருந்தும் அந்த உள்ளுணர்வு எனக்கு எப்படி தோன்றியது என்று தெரியவில்லை! அந்த காலத்திலிருந்து கிட்டத்தட்ட 55 வருடங்களுக்குப் பிறகு இப்படி அனுபவங்களை எழுதிப் பகிர்ந்துகொள்ள ஒரு சந்தர்ப்பம் வாய்த்தது அதிசயம்! 

விவரம் அறிந்த வயதிலிருந்து நான் கண்டது, கேட்டது, அறிந்துகொண்டது, என்னுடைய உணர்வுகள் என்று தொடங்கி, நாகப்பட்டின வாழ்க்கை, பின் சென்னை வாழ்க்கை (திருமணத்திற்கு முன்) அலுவலக வாழ்க்கை, திருமண வாழ்க்கை - ஓய்வுக்குப் பின் வாழ்க்கை என்றெல்லாம் நான் யோசித்துக் கொண்டு திட்டம் போட்டு வைத்திருந்தேன். 

இவற்றில், அலுவலக வாழ்க்கை பற்றி ஏற்கெனவே 'அலேக் அனுபவங்கள்' என்ற தலைப்பில், 2012 ஆம் ஆண்டு 30 பதிவுகள் எழுதி பகிர்ந்துகொண்டுவிட்டேன். 

ஆனால் - இப்படி எல்லாம் ஒரு பாலத்தில் நின்று யோசனை செய்து, வாராவாரம் ஒரு பதிவு இட்டுக்கொண்டிருந்த வேளையில்  பாலத்தின் கீழே நிறைய தண்ணீர் பிரவாகமெடுத்து ஓடி விட்டது. 

kgs அவர்களின் மரணம், (14.8.24), மனைவியின் மரணம் (28.11.24) என்று நிகழ்கால அதிர்ச்சிகள் என்னை கடந்த காலத்திலிருந்து நிகழ்காலத்திற்கு இழுத்து வந்துவிட்டன. 

இனிமேலும் நிகழ்காலத்தை லட்சியம் செய்யாமல் - பழைய கால அனுபவங்களை எழுதிக்கொண்டு இருப்பதில் மன நிறைவு இருக்காது. 

அதனால் இனிமேல் - ஒரு வகையில் Random Thoughts பகிர்வுதான் இங்கே KGG பக்கங்களில் இருக்கும். 

நீங்கள் என்ன நினைக்கிறீர்கள் என்று கருத்துகளை எழுதுங்கள். 

= = = = = = = = = = = =