ஆண்பாவம்

 

அறியா எண்ணிலிருந்து அந்த ஃபோன் வந்தபோது, எடுத்து பேசியதும்  ஆடித்தான் போனேன்.  'அறியா எண் ஃபோன் என்றால் ஏன் எடுத்தே?' என்பீர்கள்.  காரணம் பின்னால் வரும்.

"இன்டேன்லேருந்து பேசறேன்.  உங்க இன்டேன் கனெக்ஷன் சம்பந்தமா பயோமெட்ரிக் எடுக்கணும்..  எப்போ வரலாம்?"

இது என்னடா ஸ்ரீராமுக்கு வந்த சோதனை!  

"பயோமெட்ரிக்கா?  என்ன செய்வீங்க?"

"உங்கள் ஆதார் கார்ட் செக் செய்து கண் இமைகளை போட்டோ பிடிப்போம்"

"யார் நீங்கள்?"

"சொன்னேனே... இன்டேனுக்காக.."

"இதுவரை இப்படி எல்லாம் வந்ததில்லையே...   உங்கள் ஆபீஸ் எங்கே இருக்கிறது?"

"போரூர்"

"சரி...  உங்கள் ஆபீஸ் அட்ரஸ் சொல்லுங்கள்..  நானே அங்கு வந்து விடுகிறேன்"

"அது முடியாது ஸார்..  நாங்கள் அலைந்து கொண்டே இருப்போம்..."

"இதோ பாருங்க...  திடீர்னு ஒரு ஆள் தெரியாத நம்பரிலிருந்து ஃபோன் செய்து என் ஆதார் எண்ணையும், விரல் ரேகை, கண் இமை போட்டோ எடுப்பேன்  என்று கேட்டால் நான் தர முடியாது..  எனக்கு சந்தேகமாயிருக்கிறது..."

"நீங்கள் உங்கள் Gas ஏஜென்ஸியில் கேட்டுக் கொள்ளுங்கள் ஸார்.. நம்பர் தருகிறேன்"

"கொடுங்க..."

ஆதாரைக் கொடுங்க..  அடுப்பங்கரைக்கு வர்றேன்னுகிட்டு...  

கொடுத்தார்.  "கேட்டு வைங்க..  கேட்டுட்டு எனக்கு கால் பண்ணுங்க"

வைத்து விட்டார்.  அந்த எண்ணை எடுத்துக்கொண்டு இளையவனிடம்  சென்றேன்.  அவன்தான் ட்ரூ காலர் வைத்திருந்தான்.  அவன் அந்த எண்ணை வாங்கி போட்டதும் ட்ரூ காலரில் எந்த விவரமும் காட்டாமல் தனசேகர் என்று (பெயர் மாற்றப்பட்டுள்ளது) மட்டும் காட்டியது.

அவர் தந்த எங்கள் காஸ் ஏஜென்ஸியின் எண்ணுக்கு அழைத்தேன்.  அந்த எண்ணையும் ட்ரூ காலரில் போட்டு ஏஜென்ஸி நம்பர்தான் என்று தெரிந்து கொண்டிருந்தேன்.  மேலும் அது ஒரு லேண்ட்லைன் நம்பர்.  யாரும் எடுக்கவில்லை.  

சில நாட்களுக்கு முன்னால் நடந்த சம்பவம் நினைவுக்கு வந்தது.

சைபர் க்ரைம் காரர்கள் எவ்வளவு எச்சரிக்கை விடுத்துக் கொண்டிருந்தாலும், பொதுமக்களும், ஏன், போலீஸ் டிபார்ட்மெண்ட்காரர்களுமே கூட ஏமாந்து கொண்டிருந்த நேரம்.  ஒரு நீதிபதியையே ஏமாற்றினார்கள்.  இன்னொரு அரசு பெண் அதிகாரியை டிஜிட்டல் அரெஸ்ட்டில் அரைநாளுக்கும் மேல் வைத்து நிர்வாணப்படுத்தும் அளவு சென்றார்கள்.கிரேசி மோகன் நாடகங்களை இயக்கும் இயக்குனர் மௌலியின் சகோதரர் காந்தன் அவர் அனுபவத்தில் கிட்டத்தட்ட ஏமாந்துபோய், அதிர்ச்சியில் உறைந்து அக்கடைசி நொடியில் விடுபட்டு மக்களுக்கு விழிப்புணர்வாக ஒரு காணொளியை வெளியிட்டார்.

'அவர்கள்' நடத்தும் நாடகத்திலே 'இவர்கள்' எல்லாமே பாத்திரங்கள் ஆனார்கள் என்றால் நான் எம்மாத்திரம்!  எனவே டபுள் மடங்கு எச்சரிக்கையாக இருந்தேன்.  தெரியாத, அறியாத எண்ணிலிருந்து சாதாரண போன் வந்தாலே எடுக்க மாட்டேன். போதாக்குறைக்கு என் போன் வேறு ACT. Airtel Health Insurance . போன்ற இடங்களிலிருந்து ஃபோன் வந்தாலே ஸ்பாம், ஃபிராட்,  பொட்டன்ஷியல் ஃபிராட் என்று தலைப்பிட்டுக் காட்டி பயமுறுத்தும்.  இந்த நிலையில் வாட்ஸாப் வீடியோ கால் வந்தால்?  நான் ஏன் எடுக்கிறேன்?

அன்று தெரியாத எண்ணிலிருந்து வாட்ஸாப் வீடியோ கால் வந்ததும் கால்கள் நடுங்கிப் போனேன்.  கைகள் நடுங்க ஜாக்கிரதையாக அதை எடுத்து ஓரமாக டிஸ்டர்ப் செய்யாமல் வைத்தேன்.  தப்பித்தவறி கைதவறி கால் அட்டென்ட் ஆகிவிட்டால் என்ன ஆவது என்கிற பயம்.  என் மனக்கண்ணில் போலீஸ் உடை அணிந்த விறைப்பான டெல்லிவாலா ஒருவர் என்னை ஹிந்தியில் மிரட்டக் காத்திருந்தார்.  அவர் கையில் என் சம்பந்தப் பட்ட கட்டு  காகிதங்கள் இருந்தன.    

என் ஃபோன் திரையில் 'உன்னை அழைக்கும் இந்த நம்பர் உன் காண்டாக்ட் லிஸ்ட்டில் இல்லை' என்று கூடுதல் தகவல் சொல்லிக் கொண்டிருந்தது.  பக்கத்தில் போலீஸ் ஸ்டேஷன் எங்கிருக்கிறது என்று மனதுக்குள் யோசித்துப் பார்த்தேன்.   அது அடித்து முடிக்கும் வரை அதையே பார்த்தபடி அமர்ந்திருந்தேன்.   

அவர்களும் விடுவதாக இல்லை என்று தெரிந்தது.  அடுத்தடுத்து தொடர்ந்து இரண்டு மூன்று முறை அடித்தார்கள்.  

நான் ஏன் எடுக்கிறேன்?!   பயந்து கொண்டு எடுக்கவே இல்லை. பேசாமல் விட்டுவிட்டேன். என்னுடைய முன் ஜாக்கிரதையை நானே மெச்சி கொண்டேன்.  

"உஷார்டா நீ..."  

அடித்து ஓய்ந்து ஐந்து நிமிடங்களுக்கு மேல் ஆனதும் ஃபோனுடன் மகன்களிடம் சென்றேன்.  என் முன்னெச்சரிக்கையைச் சொன்னேன்.

மகன்களும் கவனமாகக் கேட்டுக் கொண்டார்கள்.  மருமகள் உள்ளேயிருந்து வந்தாள்.

"அப்பா...   பஹ்ரைனிலிருந்து என் சித்தப்பா உங்களுக்கு வாழ்த்து சொல்ல வாட்ஸாப் கால் பண்ணினாராம்.  நீங்க எடுக்கவே இல்லையாம்...  இதோ லைன்ல இருக்கார்" என்றாள்.

"அவர் நம்பர் என்கிட்டே இல்லையேம்மா...   யாரோன்னு நினைச்சு எடுக்கலை.."

வழியும் அசடைத துடைத்துக்கொண்டே ஃபோனை வாங்கி பேசினேன்.  முன்னரே  சொல்லிவிட்டு அழைத்திருந்தால் உஷாராய் எடுத்திருப்பேன்.  காரணத்தை அவரிடமும் சொன்னேன்.  சிரித்தார்.

பிளாஷ்பேக் முடிகிறது.  நிகழுக்கு வருவோம்... இன்டேன்.....

==================================================================================================

ஆண்பாவம் -  Face Book பதிவொன்றிலிருந்து அப்படியே எடுக்கப்பட்டது.

"என் சாவுக்கு பிறகு கூட எனக்கு நீதி கிடைக்கவில்லை என்றால், என் உடலை எரித்து அதன் சாம்பலை ஜான்பூர் நீதிமன்றத்தின் சாக்கடையில் கலந்து விடுங்கள், அந்த அவமானம் காலத்திற்கும் சாட்சியாக இருக்கட்டும்"

அதுல் சுபாஷின் இறுதி வரிகள், கோடிக்கணக்கான மக்களின் மனசாட்சியை உலுக்கி எடுக்கும் வரிகள்.

அதுல் சுபாஷ் பெங்களூரில் ஒரு AI Engineer, வெல் எஜுகேடட்,

இவர் சாவுக்கு காரணமாக ஐந்து பேர்களை மிக ஸ்ட்ராங்காக குறிப்பிட்டுள்ளார் சுபாஷ்,

ஒரு பெண் நீதிபதி, அவரின் மனைவி, அவரின் மச்சினன், மாமியார், அந்த மனைவியின் அங்கிள்,

என்னத்தான் நடந்தது, !?

இவருக்கும் இவர் மனைவிக்கும் பிரச்சினை, அவரின் மனைவியும், மாமியார், மச்சினன், என அவரை மொத்த குடும்பமும் மிக மோசமான முறையில் கொடுமைப்படுத்தி உள்ளது.

லட்சகணக்கில் மனைவிக்கும் அவர் குடும்பத்தாருக்கும் அவர் உதவியுள்ளார், எந்தளவுக்கு என்றால் மனையின் தாய் தந்தை சொந்தமாக வீடு வாங்கும் அளவுக்கு அவரிடம் அவர்கள் பிடுங்கியுள்ளார்.

ஒரு கட்டத்திற்கு மேல் அவர் அதை அவர் நிறுத்தி விடுகிறார், கோபம் கொண்ட மனைவி, அவரிடமிருந்து விவாகரத்து பெற போவதாக மிரட்டி குழந்தையுடன் சொந்த ஊரான உத்தரபிரதேசத்திற்கு சென்று விடுகிறார்.

அதன் பிறகு தான் அவருக்கு மன உளைச்சலை செய்யும் வேலைகளில் அந்த மனைவி ஈடுப்படுகிறார்.

அவர் மீது மிக மோசமான எட்டு பொய் வழக்குகள் பதியப்படுகிறது,

கணவர் அடித்து கொடுமைப்படுத்துகிறார், வரதட்சணை கொடுமை செய்துள்ளார், மாமனாரை கொலை செய்தார், இயற்கைக்கு மாற்றமான முறையில் செக்* செய்தார், என ஏகப்பட்ட பொய் வழக்குகள் பதியப்படுகிறது.

ஒவ்வொரு வழக்கிற்கும் பல மாதங்கள் பெங்களூருக்கும் உத்திரபிரதேசத்திற்கும் அலைகிறார்,

ஒவ்வொன்றையும் பொய் என நிரூபிக்கிறார், ஆனால் இவர்கள் வழக்கு போடுவதை நிறுத்தவில்லை,

நாற்பதுக்கும் அதிகமான முறை ஜான்பூர் நீதிமன்றத்தால் அலைக்கழிக்கப்பட்டுள்ளார்.

ஒரு கட்டத்தில் அந்த பெண் நீதிபதியிடம் வாதாடுகிறார், மாமனார் உடல்நிலை மோசமாக இருந்தால் தான் திருமணமே விரைவாக நடத்தினார்கள், அவர் இயற்கையாக மரணித்ததை குழப்பி கொலை குற்றம் சாட்டினார்கள்,

இயற்கைக்கு மாறாக எந்த உடலுறவையும் கொள்ளவில்லை, அதற்கான எந்த மருத்துவ ஆதாரமும் சமர்பிக்கப்படவில்லை,

மனைவியை அடித்து கொடுமைப்படுத்தியதாக எந்த காயமும் ஆதாரமும் இல்லை,

வரதட்சணை கொடுமை செய்தேன் என்கிறார்கள், அது உண்மையில்லை, லட்சக்கணக்கில் அவர்களுக்கு நான் உதவியுள்ள ஆதாரம் தன்னிடம் உள்ளது,

என் ஒரே பிள்ளையை என் கண்ணில் காட்டாமல் நீதிமன்றத்திற்கு கூட அழைத்து வரமால் எங்க ஏங்க வைத்து விரட்டுகிறார்கள்,

என் மீதுள்ள எல்லா வழக்குகளும் நீதிமாக விசாரித்தால் பொய் என தெரியும்,

தயவு செய்து வழக்குகளை தள்ளுப்படி செய்யுங்கள், இப்படி மன ரீதியாக பிரஷ்ஷர் கொடுப்பதால் தான் பல ஆண்கள் தற்கொலை செய்துக்கொள்கிறார்கள் என கண்ணீர் வடிக்கிறார் சுபாஷ்,

அதற்கு நீதிமன்றத்திலே அவரின் மனைவி அப்போ ஏன் உயிர் வாழ்கிறாய் செத்து தொலைய வேண்டியது தானே என சொல்கிறார், அதற்கு அந்த பெண் நீதிபதியும் ஆமோதிப்பது போல் சத்தமாக சிரிக்கிறார்.

பின்பு நீதிபதி ஐந்து லட்சம் ரூபாய் லஞ்சம் கேட்டு இந்த வழக்கை எல்லாம் முடிப்பதாக டீலிங் பேசுகிறார், இல்லை எனில் வழக்கிற்காக அலைய வேண்டியது தான் என மிரட்டுகிறார்.

தான் எந்த தப்பும் செய்யாமல், நேர்மையாக வரி கட்டி உழைத்து சேர்த்த பணத்தை நீதிபதியும் மனைவியும் அவரின் குடும்பத்தார்களும் இப்படி பேய்களாக தன்னை சூழ்ந்து பணத்திற்காக எவ்வளவு மன உளைச்சலை தருகிறார்களே என கவலைக்கொள்கிறார்.

மேற்கூறிய விஷயங்களை கிட்டத்தட்ட ஒன்றரை மணி நேரம் வீடியோ மற்றும் நாற்பது பக்கங்களுக்கு கடிதத்தை எழுதி வைத்து சுபாஷ் தற்கொலை செய்துக்கொள்கிறார்,

வடக்கு நீதிமன்றம் இந்திய சட்டப்படி நடந்துக்கொள்ளவில்லை என்றும், பெண்களுக்கு வழங்கப்பட்ட பிரதேயக சட்டங்கள் தவறாக வழி நடத்தப்படுகிறது என்றும், அப்பாவி ஆண்களுக்கு இந்த சட்டம் நீதியை பெற்று தரவில்லை என்றும், இதை எல்லாம் மாற்ற வேண்டும் என்றும் கூறி அவர் உயிரை விட்டுள்ளார்.

இந்தியா எங்கும் இதை குறித்த விவாதங்கள் எழத் தொடங்கியுள்ளது.

குடும்ப வன்முறைக்கு பெண்களுக்கு மட்டும் அல்ல, ஆண்களுக்கும் நடக்கிறது, இவர்களுக்காக மெழுகுவர்த்தி ஏந்தி போராடா யாரும் தயாராக இல்லை என்பதே உண்மை.

======================================================================================

நியூஸ் ரூம் 

பானுமதி வெங்கடேஸ்வரன் 

- டில்லியில் கடும் குளிர், பனி மூட்டம்; வெப்பநிலை 5 டிகிரி செல்சியஸ்க்கு கீழே சரிவு

-  ஆட்டோக்களுக்கு புதிய கட்டணம்; விரைவில் அறிவிக்கிறது அரசு சென்னை : தமிழகத்தில் ஓடும் ஆட்டோக்களுக்கு, 2013ம் ஆண்டு, 1.8 கி.மீ., துாரத்திற்கு 25 ரூபாய், அடுத்த ஒவ்வொரு கி.மீ.,க்கும் தலா 12 ரூபாய், காத்திருப்பு கட்டணம் ஐந்து நிமிடத்துக்கு 3.50 ரூபாய் என, நிர்ணயிக்கப்பட்டது.

-  புதுடில்லி,:பயண முகவரால் ஏமாற்றப்பட்டதை அடுத்து, 22 ஆண்டுகளாக பாகிஸ்தானில் வசித்து வந்த இந்திய பெண், நேற்று தாய் நாட்டிற்கு திரும்பினார்.

- 

-  முன் அனுமதியின்றி பணிக்கு வராத 36 அரசு டாக்டர்கள்! கேரளாவில் டிஸ்மிஸ்.

-  எங்களுக்கு வரி விதித்தால், நாங்களும் வரி விதிப்போம்; எச்சரிக்கிறார் டிரம்ப்!

-  விமானங்களுக்கு வெடிகுண்டு மிரட்டல் விடுத்தால் ரூ.1 கோடி அபராதம்!

-  பந்தலுார்: நீலகிரி மாவட்டம், பந்தலுார் அருகே படைச்சேரி என்ற இடத்தில் ஜானகி, 84, என்பவரது வீட்டு கதவை உடைத்து உள்ளே சென்ற யானை, கட்டிலுக்கு அடியில் வைத்திருந்த அரிசி உட்பட உணவு பொருட்களை எடுத்து ருசித்துள்ளது.  ஒரு மணி நேரம் வீட்டிற்குள் யானை நின்றிருந்த நிலையில், அருகில் இருந்த அறையில், ஜானகியும், பேத்தி ரேஷ்மாவும், பீதியுடன் கட்டிலுக்கு அடியில் பதுங்கி இருந்தனர்.

-  லண்டன்: தண்டி யாத்திரையின் பொழுது மகாத்மா காந்தி அணிந்திருந்த மாலையை ஏலத்தில் எடுப்பதற்கு யாரும் முன்வரவில்லை. ஆனால் இந்திய அரங்கில் வைக்கப்பட்டிருந்த பெரும்பான்மையான கலைப் பொருள்கள் நல்ல விலைக்கு ஏலத்தில் எடுக்கப் பட்டிருக்கின்றன என்பது குறிப்பிடத்தக்கது.

- பெங்களூரு: தன் மகன் திருமணத்தன்று உடுத்திக்கொள்ள வேண்டும் என்பதற்காக தன்னுடைய 35,000 ரூபாய் பெறுமானமுள்ள பனாரஸ் பட்டுப் புடவையோடு இன்னும் இரண்டு பட்டுப் புடவைகளை ஜெயநகரில் உள்ள Band Box என்னும் உலர் சலவையகத்தில் சலவை செய்து, ரோல் பிரஸ்ஸிங் செய்வதற்காக கொடுத்திருக்கிறார் ஒருவர். ஆனால் பனாரஸ் புடவை கிழிந்த நிலையில் கொடுக்கப் பட்டிருக்கிறது. இதனால் மனமுடைந்த அனுபமா பட் என்னும் அந்தப் பெண்மணி, பலமுறை அந்தக் கடையை தொடர்பு கொண்டும் அவருக்கு எந்த நஷ்ட ஈடும் வழங்கப்படாததால், கன்ஸ்யூமர் கோர்ட்டின் உதவியை நாடிய அவருக்கு 45000 ரூபாய் நஷ்ட ஈடாக வழங்கப்பட வேண்டும் என ஒரு வருடத்திற்குப் பிறகு தீர்ப்பு கிடைத்திருக்கிறது. 

- தமிழ்நாடு அரசு போக்குவரத்துக் கழகத்திடம் இருந்து கிட்டத்தட்ட 346 கோடி ரூபாய் மதிப்பிலான டீசல் பேருந்துகளை தயாரித்து, விநியோகிப்பதற்கான ஆர்டரை பெற்றுள்ளதாக அசோக் லேலண்டு நிறுவனம் அறிவித்துள்ளது.

- தனியார் மருத்துவமனைகளில் மத்திய,மாநில அரசுகளின் மருத்துவ காப்பீடு திட்டத்தில் சிகிச்சை அளிக்க மறுப்பதால் நோயாளிகள் பாதிக்கப்பட்டு வருகின்றனர்.

- திருச்சி மேலசிந்தாமணி பகுதியைச் சேர்ந்த ஹரிஹரன் என்பவர் டாட்டூ போடும் நிலையம் ஒன்றை நடத்தி வந்தார். அவர் கண்ணுக்குள் ஊசி போட்டு கண்ணின் நிறத்தை மாற்றுவது, நாக்கின் நுனியில் கட் செய்து இரண்டு நாக்குகள் போல தோன்றச் செய்வது என்பவற்றை மும்பை சென்று கற்றுக் கொண்டு தன்னுடைய நாக்கை பிளவு படுத்திக் கொண்டு அதை வீடியோ எடுத்து சோஷியல் மீடியாவில் பகிர்ந்ததோடு, தன் நண்பர் ஜெயராமன் என்பவருக்கும் செய்திருக்கிறார். உயிருக்கு ஆபத்தான இந்த செயலில் ஈடுபட்ட இந்த இருவரும் கைது செய்யப் பட்டிருக்கின்றனர்.

- டில்லி: ரயில் நிலையம் செல்வதற்காக ஊபர் டாக்ஸி  புக் பண்ணிவிட்டு காத்திருந்த பெண்ணுக்கு,"உன்னைக் கடத்தப் போகிறேன்" என்று டிரைவரிடமிருந்து மெசேஜ் வர, பயந்து வீட்டிற்குச் சென்ற அவர் ஊபரை கான்சல் செய்துவிட்டு, அந்த டிரைவர் அனுப்பிய மெசேஜை ஸ்கிரீன் ஷாட் எடுத்து சோஷியல் மீடியாவில் பகிர்ந்திருக்கிறார். ஆங்கில மொழிபெயர்ப்பில் ஏற்பட்ட பிழையும் இது நிகழ்ந்திருக்கலாம் என்கிறார்களாம்.  

=================================================================================================

ஒரு தொழில்நுட்ப ஆர்வலர் என்கிற வகையில் சமீபத்தில் சந்தைக்கு அறிமுகமாகி உள்ள மஹீந்திரா BE6E எலக்ட்ரிக் கார் அடியேனை அசர வைக்கிறது. டெஸ்லா மற்றும் BYD வரிசையில் INGLO பிளாட்ஃபார்மில் களம் இறங்கி உள்ள ஒரு இந்திய கார் என்கிற வகையில் நம்மை பெருமிதம் கொள்ளச் செய்கிறது.

இந்த காரின் ஆராய்ச்சிகள் கடந்த மூன்று ஆண்டுகளாக சென்னை மஹீந்திரா சிட்டியில் உள்ள உலகத்தரம் வாய்ந்த சோதனை மற்றும் ஆராய்ச்சி கூடத்தில் முழுக்க முழுக்க வடிவமைக்கப்பட்டுள்ளது நமக்கெல்லாம் பெருமை. மேலும் இதற்கு தலைமை தாங்கி இதை உருவாக்கியது வேலுச்சாமி எனும் இந்திய தமிழர்.

இந்த காரின் பேட்டரியை வெறும் இருபது நிமிட சார்ஜில் எழுபது முதல் 80 சதம் வரை சார்ஜ் செய்து விடலாம் என்பதுதான் ஹைலைட். இதன் பாட்டரியை உருவாக்க சீனாவின் byd நிறுவனத்தின் உலக பிரசத்தி பெற்ற பிளேடு பாட்டரி செல்கள் மட்டும்தான் இறக்குமதி செய்யப்படுகின்றன. ஆனால் 2026 முதல் வோல்ஸ் வேகனோடு ஒப்பந்தப்படி ஒருங்கிணைந்த பாட்டரி செல்களை இந்தியாவிலேயே தயாரிக்க உள்ளார்கள். இந்த வாகனம் சுமார் 80 கிலோவாட்டிற்கு, மிகப்பாதுகாப்பான லித்தியம் ஃபெரோ பாஸ்பேட் பேட்டரிகளை பயன்படுத்துகிறது.

இந்த கார் தயாரிப்பில் நூற்றுக்கணக்கான புதிய புதினங்கள் உருவாகி, அவை பேடண்டுகளை பெற்றிருக்கிறது.

இதில் மிக அற்புதமான ஒரு உருவாக்கம் என்றால் அதன் செமி ஆக்டிவ் சஸ்பென்ஷன்தான். சுமார் 200 கிலோமீட்டர் வேகத்தில் சென்று திரும்பினால் கூட வாகனத்திற்குள் எந்த மாற்றமும் தெரியாது. அதிநவீன ஸ்டியரிங் சிஸ்டமும் சொகுசு பயனத்திற்கு துணை நிற்கிறது. மேலும் மிகச்சிறந்த பாதுகாப்பு அம்சங்கள் கொண்ட கார் இது.

காரின் ஒவ்வொரு பகுதியையும் பார்த்து பார்த்து பல வல்லுனர்களின் ஆலோசனைகளோடு, செதுக்கி உள்ளனர். உதாரணத்திற்கு இசையமைப்பாளர் ஏ.ஆர்.ரஹ்மானிடம் சென்று வாகனத்தின் சவுண்ட் சிஸ்டம் டிசைனிங்கில் பல ஆலோசனைகளை பெற்றதாக சொல்கிறார்கள்.

இந்த காரை உலகத்தரம் வாய்ந்த ஒரு சொகுசு காராக, மிக வேகமாக சார்ஜ் செய்துக் கொண்டு,

500 கி.மீ. ரேஞ்ச் கொடுக்கும் வகையில், அதே சமயத்தில் இந்தியர்கள் வாங்கும் அளவிற்கு விலையில் கிடைக்கச் செய்வதுதான் தாரக மந்திரம் என்கிறார் திரு வேலுச்சாமி அவர்கள். மேலும் ஏகப்பட்ட சென்ஸார் மற்றும் AI தொழில்நுட்பத்தோடு இந்த காரே ஒரு சூப்பர் கம்ப்யூட்டர் எனலாம்.

இந்த வாகனத்தின் வடிவமைப்பில், தலைமை பொறியாளரான டாக்டர் விக்ரமன் அவர்களின் பணி அசத்த வைக்கிறது. அது போலவே இதன் பேட்டரியின் வடிவமைப்புக்கு தனஞ்சயன் அவர்களை பாராட்டலாம். மேலும் ஆயிரக்கணக்கான பொறியாளர்களின் அசாத்திய உழைப்பு இதில் அடங்கி உள்ளது. குறிப்பாக ஆனந்த் மஹீந்திரா அவர்களுக்கு ஒரு ராயல் சல்யூட்.

சுமார் 20 லட்சம் மதிப்பில் இது சந்தைக்கு வரும் என்கிறார்கள்.

அடியேன் டாட்டா நெக்ஸானை சென்னையில் இருந்து கோவைக்கு ஓட்டி

வரும் போதெல்லாம் துளியும் உடல் வலியை உணர்ந்ததில்லை. அந்த காரை விட மஹீந்திரா BE6E சிறப்பாக இருக்கும் என நினைக்கிறேன். யாரேனும் இந்த காரை ஓட்டிப் பார்த்திருந்தால் விவரம் தரவும்.

சர்வம் கிருஷ்ணார்ப்பணம்

Prakash - Face Book

======================================================================================================

---------------------------------------------------------------------------------------------------------------------------------------------------------------------------------------------

புலியூர் சரோஜா 

ரஜினி, கமல் என பெருந்தலைகளை எல்லாம் பெண்டு நிமிர்த்தி ஒரு காலத்தில் பிஸியான நடன இயக்குனராக கோலோச்சியவர் புலியூர் சரோஜா. விபத்து ஒன்றில் ஒரே மகனைப் பறிகொடுத்த சோகம் தாங்காமல் சினிமாவை விட்டு ஒதுங்கி நிற்பவர். இப்போது மகன் பெயரில் அறக்கட்டளை ஒன்றை நிறுவி, தான் செய்து வரும் நல்ல காரியங்கள் மூலம் மகன் வாழ்வதாக நினைத்துக்கொண்டிருக்கிறார். முரளி - ஜெயஸ்ரீக்கு நடனம் சொல்லித் தரும் இந்தப் படத்தை அவரிடம் காட்டினோம். முரளி தன்னை அரவணைத்துக் கொண்டிருக்கும் இன்னொரு படத்தைக் கொடுத்து நம்மிடம் பேசினார்...

‘‘ஊட்டியில் ‘காலமெல்லாம் உன் மடியில்’ படத்தின் பாடல் காட்சியை ஷூட் பண்ணினப்போ எடுத்த படம் இது. முரளியோட முதல் படமான ‘பூவிலங்கு’ படத்திலிருந்து நான் மாஸ்டராக வொர்க் பண்ணியிருக்கேன். என்னோட செல்ல மகன் இறந்த பிறகு, வாழ்க்கையின் எல்லா பக்கங்களும் இருண்டு போன உணர்வில் இருந்தேன். வளசரவாக்கத்தில் இருந்த என் பங்களாவை அப்படியே விட்டுட்டு, ஒரு சின்ன குடிசையில் என்னை நானே தனிமைப்படுத்திக்கிட்டு மூணு வருஷம் இருந்தேன். ரஜினி, கமல், விஜயகாந்த் எல்லாம் என்னை எப்படியாவது கவலையிலிருந்து விடுவிக்க முயற்சி செஞ்சாங்க. அதன் பிறகு என் மகன் பிறந்து வளர்ந்த அசோக் நகர் வீட்டுக்கு வந்தேன்.

இதயம்’ படம் ஆரம்பிச்சப்போ, முரளிகிட்டயிருந்து போன். ‘அம்மா... இந்தப் படத்தில் நீங்க வொர்க் பண்ணணும்’னு சொன்னார். நான் மறுத்தப்போ, ‘நானும் உங்க மகன்தானே... நீங்க கண்டிப்பா ஷூட்டிங் ஸ்பாட்டுக்காவது வரணும்’னு அன்பா கூப்பிட்டதால போனேன். ஸ்பாட்டுக்குப் போனப்போ ‘ஹய்யா! எங்க அம்மா வந்துட்டாங்க’ என்று என்னை கட்டிப் பிடிச்சிட்டு எல்லார்கிட்டேயும் சந்தோஷமா சொல்லிச்சு முரளி தம்பி. என் மகனே வந்து அரவணைச்ச மாதிரி பரவசப்பட்டேன். ‘என்னை அம்மான்னு கூப்பிட்ட இந்த ஒரு வார்த்தைக்காக நான் இந்தப் படத்தில் வொர்க் பண்றேன்’னு சொல்லி நீண்ட இடைவெளிக்குப் பிறகு ‘இதயம்’ படத்தில் வொர்க் பண்ணினேன்.

‘பொட்டு வைத்த ஒரு வட்ட நிலா...’ என்று மைக் பிடிச்சி முரளி பாடும் பாடல் காட்சியில் என்ன மூவ்மென்ட் கொடுக்கணும்னு முரளியே எங்கிட்ட கேட்டுச்சு. ‘ ‘சிம்லா ஸ்பெஷல்’ படத்தில் ‘உனக்கென்ன மேலே நின்றாய்...’ பாடலில் கமலோட மூவ்மென்ட்டை ஞாபகம் வச்சிட்டு சின்னதா ரீயாக்ஷன் கொடு போதும்’னு சொல்லிக் கொடுத்தேன். அதே மாதிரி தம்பி பிரமாதமா பண்ணிடுச்சு. மைக் பிடிச்சு நடிக்கறதுல மோகனுக்குப் பிறகு முரளிதான் பெஸ்ட். முரளிக்கு டான்ஸ் மூவ்மென்ட் சொல்லிக்கொடுக்கும்போதே என் மகன் ஞாபகம் வந்துடும்.

‘இதயமே... இதயமே...’ பாட்டை ரெயின் எஃபெக்ட்ல எடுத்தாங்க. முரளிக்கு மூவ்மென்ட் சொல்லிக் கொடுத்துட்டு சீட்ல போய் உட்கார்ந்ததும் மகன் ஞாபகம் வந்து கண்ணீர் வரும். கட் சொன்னதும் முரளி என் பக்கத்தில் வந்து ‘ஏம்மா அழறீங்க?’னு கேட்கும். ‘நான் அழல... மழைத் தண்ணீர்தான் கண்ணுல பட்டுடுச்சு’ன்னு சமாளிப்பேன். ‘மனசு வடிக்கிற கண்ணீருக்கும் மழைத் தண்ணீருக்கும் எனக்கு வித்தியாசம் தெரியாதுன்னு நினைச்சீங்களா?’ன்னு முரளி என்னைத் தேற்றும். அந்தப் பாட்டு சீன்ல ஒரிஜினலாவே அழுது நடிச்சிருக்கும் முரளி. என்னோட சோகத்தை  நினைச்சிக்கிட்டே அப்படி அழுது நடிச்சது. அம்மா அம்மான்னு இப்படி அன்பா இருந்த தம்பிய ஆண்டவன் ரொம்ப சீக்கிரமே கூட்டிட்டுப் போயிட்டான்.’’

- அமலன் -  நன்றி: குங்குமம்

====================================================================================================

Charu Nivedita  -  இனி இப்படி வேண்டாம்…  -  September 12, 2024

சந்தா மற்றும் நன்கொடை அனுப்புபவர்களுக்கு நான் எப்போதுமே ஒரு ஆலோசனை சொல்லியிருக்கிறேன், பணக்கஷ்டம் உள்ளவர்கள் இதில் சம்பந்தமே வைத்துக் கொள்ளாதீர்கள் என்று. மாணவர்கள், என்னைப் போன்ற தினக்கூலிகள், விளிம்புநிலை மக்கள், இல்லத்தரசிகள் போன்றவர்கள் பணம் அனுப்ப வேண்டாம் என்று கூவிக்கொண்டே இருக்கிறேன். ஏனென்றால், என் இணைய தளத்தை 80000 பேர் படிக்கிறார்கள். அதில் ஒரு நூறு பேர்தான் நன்கொடை அனுப்புகிறார்கள். இந்த நிலையில் 79,900 பேரில் ஒருவராக இருந்து விட்டுப் போவதில் உங்களுக்கு ஒன்றும் பெரிய பிரச்சினை இல்லை என்று நினைக்கிறேன்.

இந்த நிலையில் ஒரு வாசகரிடமிருந்து ஒரு ஓலை. ”எனக்கு உடம்பு சரியில்லாமல் போய் விட்டது, நான் போன மாதம் அனுப்பிய பணத்தைத் திருப்பி அனுப்புங்கள்.”

அன்னார் அனுப்பியது 1000 ரூ. கடிதம் வந்தது வாழை விமர்சனம் வெளிவந்த மறுநாள். உண்மையிலேயே அவருக்கு உடம்பு சரியில்லாமல் போயிருக்கலாம். அல்லது, என்னுடைய வாழை விமர்சனத்தைப் படித்து கோபத்தினால் உடம்பு சரியில்லாமல் போயிருக்கலாம். ஆனால் நெட்ஃப்ளிக்ஸில் அவர் இப்படிச் செய்ய முடியுமா? அல்லது, வேறு எந்த இடத்திலாவது செய்ய முடியுமா? எழுத்தாளன் என்றால் சமூகம் எந்த அளவுக்கு அவனை கேணப்பயலாக நடத்துகிறது என்பதற்கு இது உதாரணம். எனக்கு ஒரு சம்பவம் ஞாபகம் வருகிறது. அமெரிக்காவிலிருந்து ஒருவர் மாதம் ஐயாயிரம் ரூபாய் அனுப்பிக் கொண்டிருந்தார். அப்போது சங்கராச்சாரியார் மீது கொலைக்குற்றம் சாட்டப்பட்டு சிறைக்கு அனுப்பப்பட்டார். ஆன்மீகவாதிகள் எந்த அளவுக்கு அப்பழுக்கு இல்லாமல் இருக்க வேண்டும் என்று நான் ஒரு கடுமையான கட்டுரை எழுதினேன்.

என் குருநாதரை நீங்கள் திட்டி விட்டீர்கள், இனிமேல் பணம் அனுப்ப முடியாது என்று ஐயாயிரம் ரூபாய் அனுப்புவதை நிறுத்தி விட்டார். இன்னொரு நண்பர் பதினைந்தாயிரம் ரூபாய் அனுப்பிக்கொண்டிருந்தார். மாதாமாதம். இப்படித்தான் இன்னொரு சாமியாரைத் திட்டி எழுதியதும் அந்தப் பணமும் நின்று போனது.

இனிமேல் சந்தா/நன்கொடையாக அனுப்பப்பட்ட பணம் திருப்பி அனுப்பப்பட மாட்டாது என்பதை இதன் மூலம் தெரிவித்துக் கொள்கிறேன். இது முதல் முறை என்பதால் ஆயிரம் ரூபாயை அந்த அன்பருக்குத் திருப்பி அனுப்பி விட்டேன்.

சினிமா பார்க்கப் போகிறோம். சினிமா நன்றாக இல்லை என்றாலோ, அடுத்த நாள் நமக்கு உடம்பு சரியில்லாமல் போனாலோ தியேட்டர்காரரிடம் சென்று பணத்தைக் கொடு என்று கேட்போமா? எப்பேர்ப்பட்ட கேடு கெட்ட சமூகம் என்பதற்கு இது ஒரு உதாரணம்.

இதில் வாழை ரசிகர்கள் வேறு கல்லெறிகிறார்கள். இவருக்கு நன்கொடை வேறு அனுப்ப வேண்டுமாம் என்று. ஏனய்யா, ஏழு கோடியில் படம் எடுத்து விட்டு, பத்தே நாளில் எழுபது கோடி எடுத்திருக்கிறார் அதன் இயக்குனர். அம்பானியால் கூட இப்படி முடியுமா என்று தெரியவில்லை. எழுத்தாளன் நாவல் எழுதினால் அது ஒரு நூறு பிரதி விற்கும். அதில் அவனுக்கு ஒரு ஐயாயிரம் ரூபாய் ராயல்டி கிடைக்கும். அப்படி இருக்கிறது எழுத்தாளனின் பிச்சைக்கார நிலைமை.

- நன்றி கந்தசாமி சார் பேஸ்புக். 

==================================================================================

பொக்கிஷம்  :