"திங்க"க்கிழமை : வெங்காயத் தொக்கு: - மனோ சாமிநாதன் ரெஸிப்பி

 வெங்காயத்தொக்கு

இட்லி, தோசைக்கு தகுந்ததொரு பக்கத்துணை. செய்வதும் சுலபம். ஆனால் ருசி அபாரமாக இருக்கும். ஆனால் இது சின்ன வெங்காயத்துடன் மட்டுமே செய்ய வேண்டிய தொக்கு! இனி தொக்கு செய்யப்போகலாம்!

தேவையானவை:

உரித்த சின்ன வெங்காயம்- 2 கைப்பிடி

தக்காளி பழுத்ததாய் மீடியம் சைஸில்-1

புளி- சிறிய எலுமிச்சம்பழ அளவு

மிளகாய்த்தூள்- 2 ஸ்பூன்

மஞ்சள் தூள்- அரை ஸ்பூன்

தேவையான உப்பு

நல்லெண்ணெய்- 6 மேசைக்கரண்டி

வெந்தயம்- 1 ஸ்பூன், பெருங்காயப்பொடி- 1 ஸ்பூன்

செய்முறை:

புளியை வென்னீரில் அரை மணி நேரம் ஊற வைத்து கெட்டியாக கரைத்து வடிகட்டிக்கொள்ளவும்.

வாணலியை அடுப்பில் வைத்து சூடானதும் வெந்தயத்தை பொன்னிறமாக வறுத்து ஆறியதும் பெருங்காயப்பொடியுடன்  பொடித்துக்கொள்ளவும்.

சின்ன வெங்காயத்தை பொடியாக அரிந்த தக்காளியுடன் ஒரு மிக்ஸியில் போட்டு ஒன்று பாதியாக நசுக்கவும்.

மறுபடியும் வாணலியை அடுப்பில் வைத்து சூடானதும் 4 மேசைக்கரண்டி எண்ணெயை ஊற்றவும்.

வெங்காயக்கலவையை எண்ணெயில் போட்டு மஞ்சள் பொடி சேர்த்து மிதமான தீயில் சில நிமிடங்கள் வதக்கவும்.

பின் புளிக்கரைசல் மிளகாய்த்தூள் சேர்த்து கொதிக்க விடவும்.

கலவை சுருண்டு வந்ததும் வறுத்த பொடியைச் சேர்த்துக் கலந்து மிகக் குறைந்த தீயில் ஐந்து நிமிடம் சமைக்கவும்.

பாக்கியுள்ள எண்ணெயை ஊற்றி, உப்பும் திட்டமாகச் சேர்த்துக் கலக்கி மேலும் குறைந்த தீயில் 2 நிமிடங்கள் வைத்து பிறகு இறக்கவும்.

ஒரு வாரம் வைத்திருந்து உபயோகிக்கலாம்.