நாங்கள் தரிசனம் செய்த கோயில்கள் - 02 நெல்லைத்தமிழன்

 

 தொண்டரடிப்பொடியாழ்வார் அவதாரத் தலம் – திருமண்டங்குடி

சில நேரங்களில் நாம் திட்டமிடாமலேயே சில கோயில்களுக்குச் செல்ல நேரிடும். அப்படிப்பட்ட சமயங்களில் இறைவனே நமக்கு அந்த வாய்ப்பைக் கொடுத்தது போலத் தோன்றும். அப்படிப்பட்ட ஒரு கோயிலைப் பற்றித்தான் இந்த வாரம் எழுதுகிறேன்.

ஆழ்வார் பன்னிருவர். அவர்களில், மதுரகவியாழ்வார், அவரது குருவான நம்மாழ்வாரை மாத்திரமே பத்துப் பாசுரங்களால் பாடியிருக்கிறார். இதனை ‘ஆச்சார்ய பக்தி’ என்று சொல்வர்.  ஆண்டாள், அரங்கன் மீது கொண்ட அதீத பக்தியுணர்வால் பலப் பல பாசுரங்களை இயற்றி கடைசியில் அந்த அரங்கனையே கணவனாக அடைந்தாள். ஆண்டாள் ப்ரபந்தப் பாசுரங்களை இயற்றிடினும், அவர் துளசி நந்தவனத்தில் சிறு குழந்தையாகக் கிடைத்தவள் என்பதாலும், இறைவனையே கணவனாக வரித்தவள் என்பதாலும், பொதுவாக ஆழ்வார்கள் என்று சொல்லும்போது ஆண்டாளைச் சேர்ப்பதில்லை. அதனால் ஆழ்வார் பதின்மர் என்றே சொல்வர்.

இவர்களில் தொண்டரடிப்பொடியாழ்வார் இரண்டு பிரபந்தங்களை இயற்றியுள்ளார். திருமாலை மற்றும் திருப்பள்ளியெழுச்சி என்று தொடங்கும் பத்துப் பாசுரங்கள். அவர் பாடியது அரங்கனை மாத்திரம்தான். அவரது வரலாறு சுவையானது…..

விப்ரநாராயணர் என்ற இயற்பெயர் பெற்ற இவர், நந்தவனம் அமைத்து திருவரங்கப் பெருமானுக்கு புஷ்ப கைங்கர்யம் செய்துவந்தார். 

கணிகைப் பெண் ஒருத்தி, தேவதேவி என்ற பெயருடையவள், தானும் அந்தத் திருப்பணியில் கலந்துகொள்வதாகக் கூறி, சூழ்ச்சியால் விப்ரநாராயணரை மயக்குகிறாள். அவளின் நினைவாகவே அவளது வீட்டு வாயிலில் நிற்கும் நிலைக்கு விப்ரநாராயணர் வந்துவிடுகிறார்.  

இந்த அவல நிலை கண்ட ரங்கநாயகித் தாயார், இவரைத் தடு த்தாட்கொள்ளுமாறு ரங்கநாதரை வேண்ட, அரங்கனும், விப்ரநாராயணரின் ஏவலாள் என்று சொல்லிக்கொண்டு கோயில் பொன் வட்டிலை தேவதேவியிடம் கொடுத்துவிடுகிறார். கோயிலின் பொன்வட்டில் களவு காரணமாக விப்ரநாராயணர் சிறைவாசம் அனுபவிக்க நேரிடுகிறது.  பிறகு அரங்கன், அரசனின் கனவில் தோன்றி உண்மையை உரைக்க, விப்ரநாராயணர் சிறைவாசம் நீங்கப்பெறுகிறார். பெண் ஆசை நீங்கப்பெற்ற விப்ரநாராயணர், அரங்கனின் அடியார்களுக்கு அடியராய் வாழ்ந்து தொண்டரடிப்பொடி ஆழ்வார் என்ற பெயர் பெற்றார்.

இதைப்போன்ற பல வரலாறுகளை நாம் ஆழ்வார்கள், நாயன்மார்கள், ஆன்மீகச் செம்மல்கள் வாழ்வில் காணலாம். தவறுகள் செய்தாலும் அவனுடைய அருள் கிட்டுமானால் மனம் திருந்தி பெரிய நிலைக்கு ஒருவன் வரமுடியும் என்ற நம்பிக்கை அளிப்பவை அந்த வரலாறுகள்.

தொண்டரடிப்பொடி ஆழ்வாரின் பிரபந்தங்களின் சிறப்பு, அவரது திருப்பள்ளியெழுச்சி, நித்தமும் கோயில்களில் சேவிக்கப்பெறுகிறது (மற்ற இரண்டு பிரபந்தங்கள், திருப்பல்லாண்டு மற்றும் திருப்பாவை). அவரது “திருமாலை பிரபந்தம்’,  ‘திருமாலைக்கு உருகார் ஒரு மாலைக்கும் உருகார்’ என்ற புகழ் பெற்றது.

தவத்துளார் தம்மில் அல்லேன் தனம் படைத்தாரில் அல்லேன்

உவர்த்த நீர் போல என் தன் உற்றவர்க்கு ஒன்றும் அல்லேன்

துவர்த்த செவ்வாயினார்க்கே துவக்கு அறத் துரிசன் ஆனேன்

அவத்தமே பிறவி தந்தாய் அரங்கமா நகருளானே   

(திருமாலை, 31வது பாசுரம்)

நான் தவமுடையோர்கள் கூட்டத்தைச் சேர்ந்தவன் அல்லன். மிகுந்த செல்வம் படைத்தவர்களில் ஒருவனும் அல்லன்.  என்னைச் சேர்ந்தவர்களுக்கோ, உப்புத் தண்ணீர் போல ஒன்றுக்கும் உதவாதவனாக இருக்கிறேன்.  சிவந்த அதரங்களை உடைய பெண்களாலும் துரத்திவிடப்படும் கள்வனைப் போன்றவனாக இருக்கிறேன். இப்படிப்பட்ட எனக்கு வீனான பிறவி கொடுத்துள்ளாய் என்று உருகுகிறார்.

மூன்று நிலை கோபுர நுழைவாயில். இதற்கு முன்பு, நந்தவனம் ஒன்றை அமைத்திருக்கிறார்கள்.

கோபுரத்தின் உள் நுழைந்ததும், கோயிலின் தோற்றம். 

ரங்கநாயகித் தாயாருக்கு தனிக் கோயில் உண்டு.  ரங்கநாயகித் தாயார் அமர்ந்திருக்கும் திருக்கோலத்தில். 

கோயிலின் அழகிய பக்கவாட்டுத் தோற்றம். 

கர்பக்ரஹத்தின் முன் உள்ள மண்டபத்தின் அமைப்பு சோழர் காலக் கட்டிட க் கலையை ஒத்திருந்தது. (மாடம்) மாடத்தின் உட்புறம் மேற் பகுதியில் அழகிய ஓவியங்கள், காலத்தால் வெகுவாகப் பழுதுபட்ட நிலையில். 

ஒரு தடவை சென்றிருந்தபோது ஓவியங்கள் இன்னும் தெளிவாக இருந்தன.

தொண்டரடிப்பொடி ஆழ்வார் ப்ரார்த்தித்துக்கொண்ட பிரகாரம் ரங்கநாதர் இந்தத் தலத்தில் நின்ற திருக்கோலத்தில் தரிசனம் தந்தார். ரங்கநாதர் நின்ற திருக்கோலத்தில் காட்சி தரும் வெகு சில கோயில்களில் இத் தலமும் ஒன்று. இங்கு ரங்கநாதர், ஸ்ரீதேவி பூதேவியுடன் காட்சிதருகிறார்.

நின்றதிருக்கோலத்தில் மூலவர் ரங்கநாதர்.

மூலவரின் இன்னும் தெளிவான படம் இணையத்தின் தயவில். 

தொண்டரடிப்பொடி ஆழ்வார் சன்னிதி. 

இந்தக் கோயிலுக்கு இதற்கு முன்பு மூன்று முறை சென்றிருந்தாலும், அன்றைய தினம் திட்டமிடாமல் எங்களுக்கு இந்தக் கோயில் தரிசனமும், அங்கிருந்த அர்ச்சகர் மூலம் பல செய்திகளைக் கேட்கும் வாய்ப்பும் கிட்டியது.  அங்கிருந்த அர்ச்சகர், சாளக்கிராமங்களைப் பற்றியும் அவற்றை தினமும் ஆராதனை செய்வதைப் பற்றியும் பேசிக்கொண்டிருந்தார்.

மனதில் ஏதோ தோன்ற, அங்கிருந்தே என் தம்பியிடம் பேசினேன், அப்பா ஆராதனை செய்த சாளக்கிராமங்கள் எங்கே இருக்கின்றன என்று. அவனோ, அவரது ஆராதனைப் பெட்டி, ஆராதனைக்குரிய சாமக்கிரியைகள் எல்லாமே வீட்டு சன்னிதியில் இருப்பதாகவும், எனக்கு வேண்டுமானால் தந்துவிடுவதாகவும் சொன்னான். அந்த சாளக்கிராமங்களை, தான் ஆராதனம் செய்யாததால், பத்து வருடங்களுக்கு முன்பு கோயிலுக்குக் கொடுத்துவிட நினைத்ததாகவும், அது அமையவில்லை என்றும் சொன்னான். (அதை எடுத்துக்கொண்டு வரவும், இன்னொருவருக்குத் தரவும் சில முறைகள் உள்ளன. அதன்படி அவன், வேறு ஒரு வேலைக்காக சென்னை சென்றிருந்தபோது, அனைத்தையும் அழகிய பையில் வைத்துத் தந்தான். அவற்றை என் பெங்களூர் வீட்டிற்குக் கொண்டுவந்து சன்னிதியில் வைத்ததும் இனம் புரியாத சந்தோஷம் ஏற்பட்டது. )  அப்பாவின் ஆராதனைப் பெட்டி எங்கள் வீட்டிற்கு இத்தனை வருடங்கள் கழித்து வரவேண்டும் என்று இருந்திருக்கிறது.

மனதில் மிகுந்த திருப்தியுடன் அன்று மற்ற கோயில்களுக்குச் செல்ல ஆரம்பித்தோம்.

அடுத்த வாரம் வேறு ஒரு கோயில் பதிவுடன் சந்திக்கலாம்.

 (தொடரும்)