டெல்லி அப்பளம் 60 ரூபாய், இரண்டு மிளகாய் பஜ்ஜிகள் 40 ரூபாய், ஒரு டீயின் விலை 30 ரூபாய்...

 

முன்குறிப்பு : புத்தகக் அக்கண்காட்சி பற்றி தனியே இங்கு எதுவும் எழுதாமல் ஓரளவு FaceBook ல் பகிர்ந்ததைதான் இங்கும் பகிர்கிறேன். மறுபடியும், இந்த வாரமும் சொல்கிறேன்... படங்கள் அதிகம் என்பதால் பதிவு பெரிதாக தெரிகிறது!

&&&&&&&&&&&&&&&&&&&&&&&

புத்தகக் கண்காட்சி செல்பவர்களுக்கு ஒரு முக்கியமான குறிப்பு.

புத்தகங்களை பார்வையிடுவதற்கு நடுவே சாப்பிட நினைத்தால், நீங்கள் அங்கு வெளியில் சாப்பிடுவதை விட மகளிர் சுய உதவிக் குழு மூலம் நடத்தப்படும் அந்த கண்காட்சிக்கு செல்லுங்கள்.

அங்கு வித்தியாசமாக, சுத்தமாக, சுவையாக ஐட்டங்கள் செய்து தருகிறார்கள். அங்கு சமைக்கும் இடத்தை படம் எடுக்க விட்டு விட்டேன்.

-----------------------------------------------

--------------------------------------

என்னதான் விடுமுறை நாளாக இல்லாமல், வேலை நாளாக இருந்தாலும் ஓரளவுக்காவது கூட்டம் இருக்கும். இந்த அளவுக்கு ஃப்ரீயாக பார்த்ததில்லை.

இந்த வருடம் கூட்டம் கொஞ்சம் கம்மிதான் என்று பரிசல் கிருஷ்ணா பதிவுகளில் இருந்தும் தெரிந்தது. சனி, ஞாயிறு மற்றும் அரசு விடுமுறை நாளில் நகரவே முடியாமல் கூட்டம் அள்ளும். ஆனால் இந்த முறை அந்த அளவுக்கு கூட்டம் இல்லை என்று தான் அங்கு ஸ்டால்களில் பேசிக் கொண்டார்கள்.

ஒரு புகழ்பெற்ற ஸ்டாலில் இரண்டு பெண்கள் சற்றே உவகையுடன் பேசிக் கொண்டது 'சனி ஞாயிறே ஃப்ரீயாதான் இருந்தோம். இன்னைக்கு இன்னும் ஃப்ரீயாக இருக்கலாம்'.

அங்கு ஸ்டால் வைத்து இருந்த ஒரு பெண்மணி சொன்னார் "அம்பத்தூரில் இருந்து வந்திருக்கிறேன். ஐம்பதாயிரம் வாடகை இந்த கடைக்கு. சனி ஞாயிறு கூட ஒரு நாளைக்கு 2500 முதல் 4000 வரை தான் வரவு. இந்த முறை விற்பனையும் ரொம்ப மந்தம்" என்றார்.

படத்தில் காணப்படுவது போல சில கடைகளில் 'இங்கு எந்த புத்தகத்தை எடுத்தாலும் 99 ரூபாய்', என்றும் இன்னொரு செக்ஷனை பிரித்து 'இங்கு எந்த புத்தகத்தை எடுத்தாலும் 199 ரூபாய்' என்றும் மேலே சீட்டு தொங்க விட்டிருந்தார்கள். ஏற்கனவே தள்ளுபடி சேல்ஸ் பற்றி காலச்சுவடில் பார்த்ததை சொல்லி இருந்தேன்.

புத்தக கண்காட்சி முடிந்த உடனே 'இவ்வளவு கோடி விற்பனை ஆயிற்று, அவ்வளவு கோடி விற்பனை ஆயிற்று' என்று சொல்வார்கள். அப்போது பார்த்துக் கொள்ளலாம்!

இந்தப் படத்தில் உள்ளது போல ஒரு புகைப்படக்காரருடன் வந்து, புத்தகத்தை புரட்டும் பாவனையில், பார்க்கும் பாவனைகளில் எல்லாம் புகைப்படம் எடுத்துக் கொண்டார்கள். சாதாரணமானவர்களா, வி ஐ பி களா என்று தெரியவில்லை!

))))))))))))))))))))))))))))))))))))))))))))))))))

ஒரு டீயின் கதை... ச்சே... ஒரு டீயின் விலை...

சாதாரணமாக சாலையோரங்களில் நீங்கள் டீ குடித்தால் பத்து ரூபாய். அதில் டீ பாய் போன்ற கடைகள் பத்து ரூபாய், 15 ரூபாய் என்று அளவை வைத்து தரம் பிரித்திருப்பார்கள். சற்றே அதிகம் இருந்தால் 15 ரூபாய்.

சாலையில் இருந்து இந்த காம்பவுண்டை தாண்டி உள்ளே சென்று விட்டால் ஒரு டீயின் விலையை உதாரணமாக வைத்துக் கொள்வோம் என்றால்,

புத்தகங்களை ஸ்டால் ஸ்டாலாக மேயும் போது நீலச் சீருடை அணிந்த பெண்கள் டீ ,சுண்டல், ரொட்டி வகையறாக்களை ஒரு சிறு தள்ளுவண்டியில் தள்ளிக் கொண்டு வருகிறார்கள். அங்கு சுண்டலை நான் சுவைக்கும் வாய்ப்பு ஏற்படவில்லை. டீ கிடைத்தது. உள்ளே டீ 20 ரூபாய். அது வெளியே கிடைக்கும் 10 ரூபாய் டீயில் முக்கால் பங்கு இருக்கும்.

வெளியே வந்து இந்த கடைக்கு வந்து நீங்கள் கேட்டால் டீ விலை என்ன என்று படத்தில் காட்டி இருக்கிறேன். டீ கோப்பையையும் காட்டி இருக்கிறேன்.

அதோ டீக்கோப்பையை பாட்டில்கள் மேலே வைக்கிறார் பாருங்கள்... அதைத் தனியே எடுத்து க்ளோசப்பில் எடுத்த படத்தைதான் மேலே போட்டிருக்கிறேன். அதைப் பார்த்தால் ஏதோ மாபெரும் கப் போல இருக்கும் என்பதால் இங்கு அளவைக் காட்டுகிறேன்!

ஆமாம், என்ன கடை அது?' என்று நீங்கள் கேட்பீர்கள் என்று தெரியும்!

ஆமாம்.... டீ எப்படி இருந்தது என்று கேட்கிறீர்களா?

பால் அடுப்பிலேயே இருந்து கோவா பதத்திற்கு வந்திருக்க, அதை கிளறிக் கிளறி டம்ளரில் ஊற்றி, அருகில் இருக்கும் டீ டிகாக்‌ஷனை அதில் விட்டு தருகிறார்கள். எப்படி இருக்கும் என்று உங்கள் நாக்குக்கு புரிந்திருக்கும்!

டெல்லி அப்பளத்திற்கு ஆசைப்பட்டது ஒரு குத்தமாய்யா.... ஏதோ புதிதாக பொரித்து கொடுப்பார்கள் என்று பார்த்தால், முன்னதாக டோக்கன் வாங்கிக் கொண்டு வாருங்கள் என்று சொன்னார்கள். டோக்கனுடன் சென்றால் ஏற்கனவே பொறித்து வரிசையில் இருக்கும் அப்பளங்களில் இருந்து ஒன்றை எடுத்து அதில் கேசரி பவுடர் போல எதையோ தூவி கையில் கொடுத்து விட்டார்கள்.

FaceBook ல் ஏன் டெல்லி அப்பளத்தை புகைப்படம் எடுக்கவில்லை என்று கேட்டிருந்தார்கள். ஒரு கையில் மிளகாய் பஜ்ஜி என்கிற வஸ்துவும், புத்தகப்பையும். மறுகையில் பெரிய அளவில் கெட்டியான, கீழே விழுந்தால் கூட உடையாத அந்த டெல்ல்லி அப்ப்ப்பளம்! அதனால் எடுக்கவில்லை!

யானைக்கு ஜட்டி போட்டது போல் அந்த டெல்லி அப்பளத்துக்குக் கீழே பஜ்ஜிக்கு வைக்கும் சைஸ் பேப்பரை வைத்து கொடுத்து விட்டார்கள். அது எதற்கு ஆகும்?

மிளகாய் பஜ்ஜிக்கு ஆசைப்பட்டதும் தவறாகப் போனது. மிளகாய் பஜ்ஜிக்கு ஆல்டர்நேட் வாழைக்காய் பஜ்ஜி. இரண்டுமே அங்கு டிரேயில் குவிந்து கிடந்தன. அதிலிருந்து ஆறிப்போன கை எறி குண்டு போன்ற ஒரு சமாச்சாரத்தை எடுத்து கையில் கொடுத்துவிட்டார்கள். ஒரு சட்னி கூட இல்லாமல் சாப்பிடுவது மிகவும் சிரமமாக இருந்தது.

சாதாரண கடை என்றால் சூடாக போடுகிறார்களா, சட்னி கொடுக்கிறார்களா என்று பார்த்துவிட்டு பிறகு வாங்குவதைப் பற்றி முடிவு செய்யலாம். டோக்கன் போட்டுக் கொண்டு அருகில் நெருங்கியதால் மாற்றவும் முடியவில்லை.

கனமான அந்த டெல்லி அப்பளம் 60 ரூபாய். கீழே விழுந்தால் உடைந்து நொறுங்கி விடுமோ என்று பயப்பட வேண்டாம். நீங்கள் எடுத்து உடைத்தால் தான் உண்டு.

இரண்டு மிளகாய் பஜ்ஜிகள் 40 ரூபாய்.

'நீ ஏன் அங்கு போனே?' என்று கேட்பது காதில் விழுகிறது. ஆசைதான்... நப்பாசை.... நாக்கு ஆசை..

அருகிலேயே மகளிர் சுய உதவி கைவினைப் பொருட்கள் கண்காட்சி நடக்கிறது. அனுமதி இலவசம்தான். அங்கும் சாப்பிட கிடைக்கிறது. இங்கும் ஒப்பிடுகையில் அது சுவையாகவும், தரமாகவும், சுத்தமாகவும் இருக்கிறது.

**********************************************

பின்குறிப்பு...

அடுத்த வாரத்துடன் புத்தகக் கண்காட்சி விவரங்களை முடித்து விடுவேன் என்று நான் வணங்கும் முருகன் சாட்சியாக உறுதி அளிக்கிறேன்!

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

நியூஸ் ரூம் 

பானுமதி வெங்கடேஸ்வரன் +

- இக்கோவிலில் கடைசியாக எப்போது கும்பாபிஷேகம் நடந்தது என்ற தகவல் இல்லாத நிலையில், ரூ.5 கோடி மதிப்பீட்டில், கோவிலின் தொன்மை மாறாமல் திருப்பணி மேற்கொள்ளப்பட்டது. திருப்பணிகள் முடிந்து, 2023ம் ஆண்டு, நவ., 3ம் தேதி கோவில் கும்பாபிஷகம் நடத்தப்பட்ட ஆபத்சகாயேஸ்வரர் கோவில் 'யுனெஸ்கோ' விருதுக்கு தேர்வு

- தமிழ் நிலப்பரப்பில் இருந்து தான் இரும்பின் காலம் துவக்கம்: முதல்வர் ஸ்டாலின் சொன்ன சஸ்பென்ஸ்.

-  தண்ணீர் பாட்டில், 125 ரூபாய், இட்லி, 250, பிரியாணி, 450 ரூபாய் என, விலை இருக்கும். மத்திய சிவில் விமான பாதுகாப்பு பணியகம், 100 மி.லி, அளவு குடிநீர் பாட்டில் மட்டுமே எடுத்து செல்ல அனுமதிக்கிறது.  இதனால், பயணியர் அதிக விலை கொடுத்து, தண்ணீர் வாங்க வேண்டியுள்ளது. இந்த நிலையை மாற்றி, பயணியருக்கு குறைந்த விலையில், குடிநீர், டீ, காபி உள்ளிட்டவை கிடைக்கும் வகையில், மத்திய அரசு, 'உடான் யாத்ரி கபே' எனப்படும், விலை குறைவாக பொருட்கள் விற்கும் உணவகங்களை திறக்க முடிவு செய்தது.  சென்னை: 'தமிழகத்தில் உள்ள விமான நிலையங்களில், மத்திய அரசின், 'உடான் யாத்ரி கபே' என்ற, குறைந்த விலை உணவகத்தை துவக்க முன்வர வேண்டும்' என்ற, கோரிக்கை எழுந்துள்ளது. 10 ரூபாய் டீ, 20 ரூபாய் சமோசா திட்டம்

-  சென்னை:'வானத்து இளவரசி' என்று அழைக்கப்படும் பெரிய ரக சரக்கு விமானம், ஜோர்டான் நாட்டிலிருந்து சென்னைக்கு முதல் முறையாக வந்தது.  இந்த சரக்கு விமானம், 125 டன் சரக்குகளை ஒரே நேரத்தில் கையாளக்கூடியது. அது மட்டுமின்றி, பயணியர் விமானமாகவும் இயங்கக் கூடியது. ஒரே நேரத்தில் 660 பயணியர் பயணிக்கலாம்.

-  மஹாராஷ்டிரா மாநிலம் புனே சுற்றுவட்டார பகுதிகளில், குய்லின்-பார் சிண்ட்ரோம் என்ற நரம்பியல் கோளாறு கடந்த சில நாட்களாக பரவி வருகிறது. இந்த நோய், மனிதர்களின் நோய் எதிர்ப்பு மண்டலம், மூளை மற்றும் முதுகெலும்புக்கு வெளியே உள்ள நரம்புகளைத் தாக்கும். இதனால் 101 பேர் பாதிக்கப்பட்டு உள்ளனர். புனேவில் ஒரு நோயாளி இன்று உயிரிழந்தார்.

-  லக்னோ: உத்தரபிரதேசத்தில் நடந்து வரும் மஹா கும்பமேளா நிகழ்ச்சியில், உயர் தொழில்நுட்பம் கொண்ட சமையலறையில் உணவுகள் தயாரித்து தினமும் ஒரு லட்சம் பேருக்கு அன்னதானம் வழங்கப்பட்டு வருகிறது.

-  நேதாஜி மரணம் தொடர்பாக பொய்யான தகவலை பரப்புவதாக ராகுல் மீது தெற்கு கோல்கட்டாவின் பவனிபூர் போலீஸ் ஸ்டேஷனில் அகில பாரதிய ஹிந்து மகாசபா அமைப்பினர் புகார் அளித்துள்ளனர். அதன்பேரில் போலீசார் வழக்குப்பதிவு செய்துள்ளனர்.  ஜன.,23ம் தேதி நேதாஜியின் பிறந்த நாளையொட்டி, லோக்சபா எதிர்க்கட்சி தலைவரும், காங்., எம்.பி.,யுமான ராகுல் பதிவு ஒன்றை போட்டிருந்தார். அதில், ஆக.,18ம் தேதி 1945ல் நேதாஜி உயிரிழந்ததாக குறிப்பிட்டிருந்தார்.

- திருவனந்தபுரம்: கேரளாவில், குடியரசு தின விழாவில் அம்மாநில கவர்னர் ராஜேந்திர விஸ்வநாத் அர்லேகர் உரையாற்றிய போது, மேடையில் நின்றுக் கொண்டிருந்த போலீஸ் கமிஷனர் தாம்சன் ஜோஸ் மயங்கி விழுந்தது, பரபரப்பை ஏற்படுத்தியது.

-  சிறுமி பயன்படுத்தும் மொபைல் போன் டவர் வாயிலாக போலீசார் தேடியபோது, பெரம்பூர் வீனஸ் சந்தை பகுதியில் சிறுமி இருப்பது கண்டறியப்பட்டது. அங்கு, 12 வயது சிறுமி, 16 வயது காதலனுடன் தனிமையில் இருந்துள்ளார்.  அதேபோல், பெரம்பூரைச் சேர்ந்த 14 வயது மற்றொரு சிறுமி, அவரது காதலன் கரிமுல்லா, 21, உடனும், வில்லிவாக்கத்தைச் சேர்ந்த 16 வயது சிறுமி, அகரம் பகுதியைச் சேர்ந்த அபிஷேக், 19, என்பவருடனும் இருந்துள்ளனர்.  மூன்று ஜோடிகளும் தனிமையில் இருப்பதை பார்த்த போலீசார்

-  மதுரா; உத்தர பிரதேசத்தில் மனைவியுடன் சண்டை போட்ட கணவன் வாக்குவாதத்தின் முடிவில், மனைவியின் உதட்டை கடித்து குதறிய சம்பவம் அதிர்ச்சியை ஏற்படுத்தியுள்ளது.

-  விஜ்க் ஆன் ஜீ: நெதர்லாந்தில், டாடா ஸ்டீல் செஸ் 87வது சீசன் நடக்கிறது. இதன் சாலஞ்சர் பிரிவு 4வது சுற்றில் இந்திய வீராங்கனை வைஷாலி, உஸ்பெகிஸ்தான் வீரர் நாடிர்பெக் யாகூப்போயவ் மோதினர். போட்டி துவங்கும் முன் மரியாதை நிமித்தமாக வைஷாலி, நாடிர்பெக்கிடம் கை குலுக்க, தனது கையை நீட்டினார். நாடிர்பெக் இதை மறுத்து, போட்டியை துவக்கினார். பின் வைஷாலி போட்டியில் கவனம் செலுத்தி வெற்றி பெற்றார்.

                                           - வங்கதேசத்துக்கான நிதியுதவியை நிறுத்தியது அமெரிக்கா.

- பெய்ஜிங்,: ஒரே இரவில் அமெரிக்க செயற்கை நுண்ணறிவு தொழில்நுட்ப சாம்ராஜ்யத்தை ஆட்டம் காண வைத்திருக்கிறது, சீனா. டீப்சீக் ஏ.ஐ., எனும் செயற்கை நுண்ணறிவு தொழில்நுட்பம் சார்ந்த இரண்டு மாடல்களை அறிமுகம் செய்து, அந்நாட்டின் கனவை கலைத்திருக்கிறது.

- புதுடில்லி 'முல்லை பெரியாறு அணை பாதுகாப்பு இல்லாமல் இருக்கிறது என்பது கற்பனை கதை. அந்த கற்பனையை எல்லாம் ஏற்க முடியாது' என, உச்ச நீதிமன்றம் மீண்டும் திட்டவட்டமாக தெரிவித்துள்ளது.

-  சென்னை : தமிழகத்தில் மினி பஸ்களுக்கான புதிய திட்டத்தை, தமிழக அரசு அறிவித்துள்ளது. மினி பஸ்கள் கட்டணமும் மாற்றப்பட்டு உள்ளது. மேலும், சென்னையில் முதல்முறையாக மினி பஸ்கள் இயக்க தனியாருக்கு அனுமதி அளிக்கப்பட்டுள்ளது.

-  விண்வெளி துறையில் உலக நாடுகளை திரும்பி பார்க்கும் வகையில் பல்வேறு சாதனைகளை இந்தியா படைத்து வருகிறது. அந்த வகையில் இஸ்ரோவின் 100வது ராக்கெட் இன்று விண்ணில் ஏவப்பட்டது.

-  சென்னை : 'ரயில்களில் நள்ளிரவு மொபைல் போன் சார்ஜிங் வசதி இருக்காது' என, ரயில்வே அதிகாரிகள் தெரிவித்தனர்.

-  மங்களூரு: தட்சிண கன்னடா, பந்த்வால் தாலுகா, புஞ்சலகட்டா கிராமத்தில் வசித்த சேத்தன்(25) என்பவருக்கும், குந்தாபூரின் சைதன்யா(24) என்னும் பெண்ணுக்கும் இன்ஸ்டாகிராம் மூலம் ஏற்பட்ட பழக்கம் காதலாக மாறி திருமணமும் நிச்சயிக்கப்பட்ட பட்டது. இந்நிலையில் சேத்தனுக்கு வேறொரு பெண்ணுடனும் இன்ஸ்டாகிராம் மூலம் தொடர்பு ஏற்பட்டது. அந்த இரண்டாவது பெண்ணின் போஸ்டிற்கு சேத்தன் ஹாட்டின் லைக் கொடுத்ததை பார்த்த சைதன்யா சேத்தனோடு தகராறு செய்திருக்கிறார், இதனால் மனமுடைந்த சேத்தன் தூக்கிட்டு தற்கொலை செய்து கொண்டு விட்டார்.

- மைசூரு: பஸ்ஸில் பயணம் செய்த பெண் தலையை வெளியே நீட்டியபொழுது பேருந்தை முந்திச் செல்ல முயன்ற லாரியில் அவருடைய தலையும், கையும் மாட்டிக்கொள்ள, ஸ்தலத்திலேயே மரணமடைந்தார். லாரியோடு தப்பிச்சென்ற லாரி ஓட்டுனரை போலீஸ் தேடி வருகிறது.

- வெளிநாடுகளுக்கு அமெரிக்கா செய்து வந்த நிதி உதவியை தற்காலிகமாக நிறுத்தி வைக்க டிரம்ப் உத்தரவிட்டுள்ளார்.

- வழக்கறிஞராக வருவோரில் 10 ல் 7 பேர் தகுதியற்றவர்கள் - உச்ச நீதிமன்ற நீதிபதி சுந்தரேஷ் கவலை.

- சென்னை: நடிகர் கஞ்சா கருப்பு மூன்று லட்சம் ரூபாய் வாடகை பாக்கி வைத்திருப்பதாகவும், வீட்டை லாட்ஜ் போல மாற்றி விட்டதாகவும் வீட்டின் உரிமையாளர் காவல் நிலையத்தில் புகார் அளித்துள்ளார்.

- கெளஹாத்தியில் இருக்கும் முதியோர் இல்லம் ஒன்றில் இருந்த திருமணமாகாத 70 வயது தாத்தாவும், திருமணம் செய்து கொள்ளாத 65 வயது பாட்டியும் திருமணம் செய்து கொண்டிருக்கின்றனர். அவர்கள் திருமணத்தை அந்த முதியோர் இல்ல நிர்வாகிகளே விமரிசையாக நடத்தி வைத்துள்ளனர்.

- உத்தர்கண்டில் அமலுக்கு வந்தது பொது சிவில் சட்டம்.

- French fries எனப்படும் உருளைக் கிழங்கு வறுவல் இறக்குமதி செய்து கொண்டிருந்த நாம்(இந்தியா) இப்போது அதை ஏற்றுமதி செய்யும் நிலைக்கு உயர்ந்துள்ளோம்.

- கோலார்: வயல்களில் திருஷ்டி படக்கூடாது என்பதற்காக திருஷ்டி பொம்மைகளை வைப்பதுண்டு. கோலாரில் உருளைக் கிழங்கு பயிரிட்டுள்ள விவசாயிகள் திருஷ்டி படக்கூடாதென்பதற்காக சினிமா நட்சத்திரங்கள் உள்பட பெண்களின்  கவர்ச்சிகரமான படங்களை பேனரில் ஒட்டி வைத்துள்ளனர். அவற்றை அகற்றும்படி பெண்கள் புகார் தெரிவித்துள்ளனர்.

=============================================================================================

பாலகணேஷ் FaceBook ல் அறிவித்திருக்கும் சிறுகதைப்போட்டி ஒன்று.  படத்துக்கு ஏற்ற கதை!  நீங்களும் எழுதுங்களேன்....  

=========================================================================================

எழுத்தும் தொழிலும் என்கிற ஒரு தொடர் வந்ததது - அமுதசுரபி அல்லது கலைமகளில்...  அதில் பல எழுத்தாளர்கள் தங்கள் தொழிலையும் எழுத்து வாழ்க்கையையும் எழுதி இருக்கிறார்கள்.  எடுத்து வைத்திருக்கிறேன்.  பகிர நேரம் வரவில்லை.  அதில் ஜா.சீ எழுதிய பகுதிக்கு புத்தகாசிரியரின் முன்குறிப்பு!

=================================================================================================

FaceBook ல் பார்த்து நெகிழ்ந்த படம்...

இந்த மீன் பற்றி குறிப்புகள் தரும் ரீல்ஸ் பகுதி.  அதன் பெயர் 'ஒட்டி' யாம்.  சுவரொட்டி என்பது போல...  அங்குள்ள சுவர்களில், தரையில் வைத்தால் அது அங்கு இறுக்கப் பிடித்துக் கொண்டு விடுகிறது.  எடுப்பதே சிரமமாக இருக்கிறது என்பதைக் காட்டினார்.  திமிங்கிலம் போன்ற மீன்களின் வயிற்றுப பகுதியில் ஒட்டிக்கொண்டு உயிர் வாழுமாம்.

============================================================================================================

"எங்கிருந்தாலும் வாழ்க" பாடலின் சரண வரிகளின் டியூனில் நான் மாற்றி 2014ல் எழுதி பகிர்ந்திருந்த பாடல், கவிதை!

==========================================================================================

திரு கந்தசாமி பகிர்ந்திருந்த இந்த செய்திக்கு நான் அங்கு கொடுத்த என் கமெண்ட்டையும் கீழே கொடுத்திருக்கிறேன்!

கலைமேதை பாலசரஸ்வதிக்கு மியூசிக் அகாடமியில் அவருக்கு விருது ..

பொன்னாடை ..பதக்கம் ..

மூன்றடி உயரம் - அகலத்திற்கு பாராட்டுப்பத்திரம் ...

விழா நடத்தியவர்கள்

பாராட்டிப்பேசியவர்கள்

காலில்விழுந்து ஆசி பெற்றவர்கள்

பார்வையாளர்களாக வந்திருந்த கலையுலகப் பிரபலங்கள் ...

அனைவரும் தத்தம் கார்களில்ஏறி சிட்டாகப் பறந்துவிட ...

பதக்கம் - பொன்னாடை - வாழ்த்துமடல் ஆகியவற்றை சுமந்துகொண்டு பாலாவின் மகள் அவரை ஒரு கையால் பிடித்தபடி நின்று ஆட்டோவுக்காகக் காத்திருந்து அலுத்துப்போய் சைக்கிள் ரிக்ஷாவில் ஏறிப்போன காட்சி இன்னும் கண்முன்னே நிற்கிறது ...!

-எம். எஸ். பெருமாள்

===============================================================================================

மறைக்கப்பட்டு, மறக்க வைக்கும் விஷயங்களிலிருந்து ஒன்று....

=================================================================================================

பொக்கிஷம் :-

========================================================================

இவ்வளவு சேர்த்தும், இன்னும் ஏதோ சேர்க்கவில்லையோ, குறைகிறதோ என்றே தோன்றுகிறதே..  ஏன் ஸ்ரீராம்?