தன்னையறிந்தவர்க்கு தானாகி நிற்பவனே என்னையறிந்துக் கொண்டேன் மன்னனே

 கண்ணன் என் காதலன்னு கேள்விப்பட்டிருப்பீங்க..  கண்ணன் என் தோழன்னு சொல்லக் கேட்டிருப்பீங்க... கண்ணன் ஒரு கடன்காரன்னு கேள்விப்பட்டிருக்கீங்களா?

கடன்காரன்னா கடன் வாங்கினவன் இல்லை, கடன் கொடுத்தவன்!  கடன் கொடுத்தவன்னு சொல்வது கூட தப்பு.  ஒருத்தன் கண்ணன் பேர்ல அவன் மனைவி போட்டு வச்சிருந்த உண்டியல்லேருந்து கொஞ்சம் காசு எடுத்துடறான்.  அதை வசூல் பண்ண கிருஷ்ணன்  விடுகிறார்.  ஏனோ சாம்புவிடம் அவருக்கு ஒரு பிரியம்.

V கோபாலகிருஷ்ணன் குழுவினருக்காக வாலி எழுதிக் கொடுத்த 'ஸ்ரீ கிருஷ்ண விஜயம்' நாடகத்தில் தேங்காய் கதாநாயகன் சாம்பு அய்யராக நடிக்க, வெற்றிகரமாக ஓடிக் கொண்டிருந்தது.  அப்போதெல்லாம் இப்படி நாடகங்கள் நிறைய வெளியாகி இருக்கின்றன.  இப்போதெல்லாம் அப்படியான நாடகங்கள் வருவது குறைந்து விட்டது.  அதற்கு ரசிகர்கள்தான் காரணம்.

இந்த நாடகத்தை படமாக்க நினைத்து சாம்பு அய்யராக நடிக்க சிவாஜியை அணுகி இருக்கிறார்கள்.  அவர் 'தேங்காயே நல்லா நடிக்கிறார்...  படத்திலயும் அவரையே ஹீரோவா போட்டுடுங்க' என்று சொல்லிவிட.  அப்படியே ஆனது.

வாலி திரைக்கதை, வசனம், பாடல்கள் எழுத 'கலியுகக்கண்ணன்' படம் ரெடியானது.  கிருஷ்ணன் பஞ்சு இயக்கத்தில் V. குமார் இசையில் 1974ல் வெளிவந்து பெருவெற்றி பெற்றது.  எந்த அளவு வெற்றி பெற்றது என்றால், இது பெற்ற வெற்றியின் காரணமாக இதை தெலுங்கு, கன்னடம், ஹிந்தி என்று எல்லா மொழிகளிலும் எடுத்தார்கள்.   

ஜெய்சங்கர் தேங்காயின் மகனாக சாதாரண ரோலில் நடித்திருப்பார்.  

சாம்பு அய்யர் அவ்வளவு கடவுள் நம்பிக்கை இல்லாதவர்.  அவர் மனைவி சௌகார் வைத்திருக்கும் உண்டியலிலிருந்து காசு எடுத்து ரேஸ் ஆடி விடுகிறார்.  அவ்வளவுதான்..   ராத்திரி மொட்டைமாடியில் தூங்கும் தேங்காயிடம் கிருஷ்ணன் நேரில் வந்து கடனைக் கேட்கிறார்!   இவர் சர்வசாதாரணமாக அவரை ஒரு சகமனிதனைப் போல டீல் செய்கிறார்.  

படத்தில் கிருஷ்ணனாக வருபவர் இவர்தான்.  யாரென்று தெரிகிறதா? சொன்னால் ஆச்சரியப்படுவீர்கள்.  நடிகர் நீலுதான் இவர்.  இவரை ஒருமுறை குமுதம் படைத்தும் விநோதப் போட்டி ஒன்றுக்காக (நடிகர்கள் மாறுவேஷத்தில் வருவார்கள்.  அவர்களைக் கண்டுபிடிக்கவே வேண்டும்.  ஊரும் நாளும், நேரமும் சொல்லி விடுவார்கள்)  தஞ்சாவூரில் ஹவுசிங் யூனிட்டில் எங்கள் தெருவில் வந்து பிடிபட்டார்!

ஆனால் மறுபடி கொஞ்ச நேரம் படத்தை பார்த்ததும் குரல் வேறு யாரையோ நினைவு படுத்துகிறது.  நீலகண்டன் என்னும் பெயரை வைத்து விக்கியே குழம்பி விட்டதோ என்று எண்ணத்தோன்றுகிறது!  அவரை விவேகா பைன் ஆர்ட்ஸ் நீலு என்று நம்ப முடியவில்லை.

எச்சரிக்கைக்கு குறிப்பு :  கீழே சென்று பாடலைக் கேட்டு விட்டு நேரம் இருக்கும்போது காட்சியைப் பாருங்கள்.

தேங்காய் கொஞ்சம் கொஞ்சமாக பணக்காரன் ஆனாலும், கண்ணனுக்கு அந்தக் கடனை மட்டும் திரும்பிச் செலுத்தாமலேயே இழுத்தடிக்க, கடைசியில் கிருஷ்ணன் தேங்காய் அறியாமலேயே அந்தப் பணத்தை எப்படி வசூல் செய்தேன் என்று சொல்லி மறைகிறார்.  

நம்பாத போதெல்லாம் எதிரில் வந்த கிருஷ்ணன், அவன் இருக்கிறான் என்று நம்பியதும் வரவில்லை என்று ஏங்குகிறார் சாம்பு.  தவறை உணர்ந்த தேங்காய் சாம்புவின் உருவத்தில் டி எம் எஸ் குரலில் சிவாஜி ஆக்ஷனில் வாலியின் பாடலை V. குமாரின் இசையில் பாடியபடியே உயிரை விடுகிறார்.

ஒரு காட்சியில் இரவு கண்ணனைப் பார்த்ததாக தேங்காய், மகன் ஜெய்சங்கரிடம் சொல்ல, "ம்ம்..  அப்படியா?  எப்படிப்பா இருந்தார்?" என்று ஆர்வமாகக் கேட்பார் ஜெய்.  "அப்படியே N T ராமாராவ் மாதிரி இருந்தார்டா" என்பார் தேங்காய்.

கண்ணனை தேங்காய் "ஓய்..  கிருஷ்ணஸ்வாமி" என்றுதான் படம் முழுவதும் அழைப்பார்.  கண்ணன் கேட்கும் ஒவ்வொன்றுக்கும் அகந்தையுடனும், எள்ளலுடனும் தேங்காய் பேசுவது ரசிக்கக் கூடியது.  சுவாரஸ்யமான காட்சிகள் கொண்ட படம்.

இன்று பகிரும் இந்தப் பாடல் அருமையான தத்துவங்கள் நிறைந்த பாடல்.   

முருகா என்றழைக்கவா முத்துக்குமரா என்றழைக்கவா என்று ஒரு பக்திப்பாடல் உண்டு.  அதற்கு பதில் சொல்வது போல முருகன் என்றும் அழைக்கலாம் முத்துக்குமரன் என்றும் அழைக்கலாம் என்று சீர்காழி ஒரு பாடல்   .இப்போது அதை எங்கே தேடினாலும் கிடைக்க மாட்டேன் என்கிறது. 

காதோடுதான் நான் பேசுவேன் என்று ஒரு பாடல் பாலச்சந்தர் படத்தில் எல் ஆர் ஈஸ்வரி பாடுவார்.  அதற்கு பதில் போல இன்னொரு பாலச்சந்தர் படத்தில் சுசீலாம்மா 'நான் சத்தம் போட்டுதான் பாடுவேன்' என்று ஒரு பாடல் பாடுவார்.

அதுபோல 1973 ல் வெளியான கெளரவம் திரைபபடப்பாடலான "நீயும் நானுமா" பாடலுக்கு பதில் சொல்வது போல இந்தப் பாடல் அமைந்திருக்கும்!  

இதுபோல சில கேள்வி பதில் பாடல்கள் தமிழ்த் திரைப்பாடல்களில் பார்க்கலாம் /  கேட்கலாம்.

வரிவரியாக ரசிக்கக் கூடிய பாடல்.  இப்போதும் எனக்கு மனப்பாடம்!

ஜெயிச்சுட்டே கண்ணா நீ ஜெயிச்சுட்டே

தெறந்துட்டே கண்னை தெறந்துட்டே

ஜெயிச்சுட்டே கண்ணா நீ ஜெயிச்சுட்டே….

உன்னிடத்தில் தோற்றத்தில் வெற்றி எனக்கு

கண்ணா நான் யார் கிட்டடா தோத்தேன்

சாதாரண மனுஷன் கிட்டயா….

உன்னிடத்தில் தோற்றத்தில் வெற்றி எனக்கு

என்னை தெளிய வைத்தாய் தன்னை

புரிய வைத்தாய் என் நன்றி உனக்கு

கண்ணா ஜெயிச்சுட்டடா நீ

ஜெயிச்சுட்டே கண்ணா நீ ஜெயிச்சுட்டே

சூரியனைப் பார்த்து இந்த நாய் குலைத்தது

உன் சூடு பட்டு கேடு கெட்டு வாய் அடைத்தது

அகந்தை பிடித்த சிறு குழந்தை பிடித்த

பிடிவாதம் தீர்ந்ததிங்கு பாரடா

உன்னை வென்று நின்றவன் யாரடா….

கண்ணா உன் நாடகத்தில் நானொரு பாத்திரம்

உனக்கு முன் நான் எம்மாத்திரம்

ஜெயிச்சுட்டே கண்ணா நீ ஜெயிச்சுட்டே

எட்டடுக்கு கட்டிடத்தில் ஒன்பது ஓட்டை

இதில் நல்ல ரத்தம் உள்ள மட்டும் எத்தனை சேட்டை

கண்ணா சக்தி இருந்தப்ப புத்தியில்லை

புத்தி இருக்கிறப்போ சக்தி இல்லை

கொண்டு வந்தென்ன கொண்டு செல்வதென்ன

ஒன்றுமில்லையே முடிவிலே

இதை உணர்ந்த பிள்ளை உன் மடியிலே

கண்ணா நீதான்டா ஜெயிச்சே……

ஜெயிச்சுட்டே கண்ணா நீ ஜெயிச்சுட்டே

​ஆணவத்தை விட்டொழித்தேன் ஓடி வருக

கண்ணா நானிருக்கும் வாசலை நீ தேடி வருக

கண்ணா நானொரு பைத்தியக்காரன்

நீ வேறு நான் வேறுன்னு நெனச்சப்ப நீ வந்தே

நீ என் நெஞ்சுக்குள்ளேயே இருக்கிறப்போ எப்படி வருவே

ஆணவத்தை விட்டொழித்தேன் ஓடி வருக

கண்ணா நானிருக்கும் வாசலை நீ தேடி வருக

தன்னையறிந்தவர்க்கு தானாகி நிற்பவனே

என்னையறிந்துக் கொண்டேன் மன்னனே

எனக்குள் கீதை எடுத்துரைத்த கண்ணனே

கண்ணா………..கண்ணா………..கண்ணா…