எங்கள் கேள்விகள் - ஒரு கேள்வியின் பதிலுக்கு பரிசு!

 

ஜெயகுமார் சந்திரசேகரன் : 

சனாதனம் எந்த மொழியில் உள்ள வார்த்தை. அதன் சரியான தமிழ் அர்த்தம் என்ன? அதற்கும் மதத்திற்கும் என்ன சம்பந்தம்?

# சனாதனம் என்றால் சமஸ்கிருதத்தில் "அழிவற்றது - மாற்றமில்லாதது" என்று பொருள்.‌

ஆதியில் ஒரே "மதமாக" இருந்ததால் பாரத தேசத்தின் "மதம்" (வேதம் சார்ந்த என்ற பொருளில் வைதிக மதம் என்றும்) மாற்றம் கொள்ளாதது என்ற பொருளில் சநாதனம் என்றும் குறிக்கப்படுகிறது.

நெல்லைத்தமிழன்: 

மழை வருவதை நாம் எல்லோரும் வரவேற்போம். ஆனால் பாருங்க, நெல் வயல்கள் விளைந்து அறுவடைக்குத் தயாராக இருக்கிறது. கும்பகோணம், நாகை பகுதியில் மழை பெய்தது. விவசாயிகளுக்குத் தூக்கம் இல்லை, இரவெல்லாம் முழித்து அறுவடை செய்கிறார்கள், கொஞ்சமாவது விளைச்சலைக் காப்பாற்ற. 

மழை நல்லதா கெடுதலா?

# மழை கெடுதல் அவ்வப்போது செய்வதும் உண்டு .‌ ஆனால் கெடுதல் செய்வதை விட நல்லது செய்வது அதிகம் .‌

1. உங்கள் பொழுது போக்குகள் என்ன என்ன? 

# என் பொழுது போக்குகள்: வேதாந்தம், அரசியல், இலக்கியம், சமயம், பிரயாணம் எல்லாம் யூடியூபில் பார்ப்பது.  சமீபத்தில் கதை எழுத முயற்சிப்பது. மிகச் சொற்பமாக படிப்பது. 

& blog தயாரிப்பு, மின்நிலா புத்தகம் தயாரிப்பு, wordle, சொல்லியடி, வார்த்தையோடு விளையாடு, ஆன் லைன் டிரேடிங் ( F & O) இப்படி நிறைய. 

2. எந்த வயதில் நம்மைவிடப் பொடியனான குழந்தைகள் சொல்லைக் கேட்டுக் கடைபிடிக்கிறோம்? 

# நமக்கு 70+ அல்லது இளையவருக்கு 25+ ஆகும்போது.

& அவர்களோடு விளையாடும்போது. 

3. நம் உடம்பிறந்தாங்களுடன் பேசுவதுபோல்  மனைவி/கணவன் உடம்பொறந்தான்களிடம் நெருக்கம் வருமா?

# அது இரண்டு பக்க மனநிலை சார்ந்தது.

& சொந்தத்தில் கல்யாணம் செய்துகொண்டதால், என்னைப் பொருத்தவரை இரண்டு பக்க உறவினர்களிடமும் சகஜமாக பேச முடியும்.  

4. இப்போதும் நம் பெற்றோர்களிடம் பேச பகிர்ந்துகொள்ள அன்பைக் காண்பிக்க விஷயங்கள் இருக்கிறதா? என்ன என்ன?

# முன்னோர்கள் பற்றிய தகவல்கள். அந்தக் கால வாழ்வு முறை - மதிப்பீடுகள் .சொந்தங்கள் பற்றி அவர்களது அனுபவம்.

& இருக்கும்; இருக்கிறது. இப்போதும் என்பதற்கு என்ன வயது லிமிட் ? நான் என்னுடைய பெற்றோர்கள் உயிருடன் இருந்தவரை அவர்களோடு நிறைய பேசியிருக்கிறேன். 

5. அடுத்தவர் எப்போது மறைவார் என்ற ரகசியம் தெரிந்தால் என்னவாகும்? அவருக்கே ஒரு வருடத்துக்கு முன்பே தெரிந்துவிட்டால் வாழ்வில் நிகழ்வுகளில் ஒரு ஒழுங்குமுறை வந்துவிடாதா?  எப்படி இறப்பு எனத் தெரியக்கூடாது.

# முதலில் ஒரு திகில் உணர்ச்சி. சில சமயம்‌ ஆழ்ந்த கவலை. முடிவு நெருங்க நெருங்க விரக்தி.‌

*  "சாகற நாள் தெரிஞ்சிப்போச்சுன்னா வாழற நாள் நரகமாயிடும்.  சந்த்தோஷம்தான் முக்கியம்."  (< <  Click the lines)

இது நான் சொல்லவில்லை.  எழுத்தாளர் சுஜாதா எழுதி ரஜினி சொல்லி இருக்கார்!

கே. சக்ரபாணி சென்னை 28

மேடைக்கச்சேரிகளில்  பாடகர்கள் பாடும் போது  மேடையில்   இசைக்குழு தலைவர்  இரண்டு  கைகளையும் ஆட்டிக்கொண்டே  சைகைகாட்டுவார்.  ஆனால் பாடகர்களோ  இசைக்குழுவை சார்ந்தவர்களோ  அதை கவனிக்கவே மாட்டார்கள். ஏனெனில்  ஏற்கனவே  பயிற்சி  எடுத்து தான்  மேடையில் வந்து பாடுகிறார்கள்.  மேடையில்  இதை பார்க்கும் போது  என்ன நினைப்பீர்கள்?

# நான் இந்த மாதிரி இசைக்குழு நடத்துபவர் கையசைத்து இசைக்கச் செய்யும் நிகழ்ச்சி எதையும் நேரில் பார்த்ததில்லை.  ஆனால் மேற்கத்திய இசைக்கு நடத்துபவர் ரொம்ப முக்கியம்.  அவர் பெயரும் புகழும்தான் ரசிகர்களை ஈர்க்கிறது.  எனவே இந்த அபிநயத்தில் நாம் அறியாத சூட்சுமம் இருந்தாக வேண்டும்.

முன்பெல்லாம்  நிறைய மருந்துகளின்  பெயர்கள்  My Sin  என்று முடியும்.  ஆனால்  இப்போதெல்லாம்  வரும் மருந்துகளின் பெயர்களில்   My Sin  என்று  வருவதில்லை  கவனித்தீர்களா.  இப்போதெல்லாம் யாரும்  பாவம் செய்யவில்லை என்று எடுத்துக்கொள்ளலாமா?

# உங்கள் பாபம் அல்லது என்னது என்றல்ல.  My sin அல்ல mycin.  பூசண வகை ( fungus ) முதலாகக் கொண்டதன் குறியீடாம்.‌ இப்போதும் பரவலாக உண்டு. 

& அந்த வகையில் எனக்குப் பிடித்த மருந்து 'எறி த்ரோ மை சின்'  (Erythromycin ) அதாவது எறி (throw) my sin !!

= = = = = = = =

எங்கள் கேள்விகள்: 

1) எந்த வயதிலும் மற்றவர்களின் பாராட்டுகளை விரும்புவது மனித குணம் என்று சொல்கிறார் என்னுடைய நெருங்கிய நண்பர் ஒருவர். எனக்கு அப்படித் தோன்றவில்லை. நீங்கள் என்ன நினைக்கிறீர்கள்? 

2) பாராட்டு போலியான பாராட்டு என்று தெரிந்தால் அதை நீங்கள் ஏற்றுக்கொள்வீர்களா? 

3) அப்படிப்பட்ட போலியான பாராட்டுகளால் என்ன நன்மை விளையும் என்று எதிர்பார்க்கிறீர்கள்? 

4) இது கணக்கு இல்லை; காமன் சென்ஸ் கேள்வி. 

என் தாத்தா படித்த, 'உலக மகா எழுத்தாளர்களின் ஒப்பற்ற சில  சிறுகதைகள்" புத்தகங்கள் - மொத்தம் ஏழு தொகுப்புகள். ஒவ்வொரு புத்தகமும், 14 மி மீ தடிமன் கொண்டதாக இருக்கிறது. புத்தகத்தின் அட்டை ஒவ்வொன்றும் 2 மி மீ தடிமன் அட்டை கொண்டது. அதாவது ஒவ்வொரு புத்தகத்திலும் அட்டைகள் (2 + 2 மி மீ,) + (10 மி மீ கனத்திற்கு பக்கங்கள் ) 

படம் பார்க்கவும் : 

இப்போ கேள்வி பகுதிக்கு வருகிறேன். தாத்தா காலத்து புத்தகம் என்பதால் அவை யாவும் தாத்தா காலத்து மர பீரோவில் படத்தில் உள்ளபடி வரிசையாக அடுக்கப்பட்டிருந்தன. 

இராமபாணம் என்று அழைக்கப்படும் புத்தகப் பூச்சி (புத்தகப் புழு?) ஒன்று பல காலமாக யாரும் தொடாமல் இருந்த இந்தப் புத்தகங்களை துளையிட ஆரம்பித்தது. 

முதல் தொகுதி, முதல் பக்கத்திலிருந்து, கடைசி ஏழாவது தொகுதியின் கடைசி பக்கம் வரை துளையிட்டு வைத்தது. 

இராமபாணம் பூச்சி, மொத்தம் எவ்வளவு நீளத்திற்கு துளைத்தது? (இந்தக் கேள்விக்கு சரியான பதில் சொல்லும் முதல் மூன்று பேர்களுக்கு பரிசு உண்டு. விடைக்கு, விளக்கம் எழுதவேண்டாம். )

= = = = = = = = = =

KGG பக்கம் :

29-12-24 மதியம் 2 மணி சுமாருக்கு பாண்டிச்சேரி ரிசார்ட் போய்ச் சேர்ந்ததும், எங்கள் ஏழு பேரையும் உட்கார வைத்து, ஆளுக்கு ஒரு தொப்பி கொடுத்து, பிறகு பச்சைக் கலரில் ஒரு திரவம் கொடுத்தார்கள். 

அந்த ஜூஸ் , நிறமும், மணமும் சுவையும் மாவடு ஜூஸ் போல இருந்தது! 

கிட்டத்தட்ட ஒரு மணி நேரம் கழித்து நேரே டைனிங் ஹால் - அங்கே கிடைத்தவைகளை கபகபவென்று அவரவர்கள் டேஸ்ட்டுக்கு ஏற்ப சாப்பிட்டு அதோடு ஒரு காபியும் குடித்தோம். 

அதற்குப் பின் சிறுவர்கள் விளையாடுமிடம், புல்வெளி எல்லாவற்றையும் சுற்றிப் பார்த்தோம். 

சறுக்கு மர விளையாடல்! 

ஃப்ளையிங் சாஸர் பறக்க விட்டு பிடித்தல்! 

அதற்குப் பிறகு ரிசார்ட் முதல் மாடியில் அமைந்துள்ள indoor games பகுதிக்கு சென்று அங்கே snookers மகன்&Co விளையாடுவதை பார்த்துக்கொண்டு இருந்தேன். 

மகன் வற்புறுத்தியதால், கம்பை கையில் வாங்கி, இடது கை கட்டை விரல் அருகே அதை position செய்து வலது கையால் கம்பை இழுத்து ஒரு வாங்கு வாங்கினால் ---- ஒன்றும் ஆகவில்லை! பந்துகள் ஒன்றோடு ஒன்று மோதி தாறுமாறாக ஓடி எதுவும் பாக்கெட்டில் விழாமல் என்னைப் பார்த்து சிரித்தன. 

ஏதோ நானும், "கம்பெடுத்து ஆடுவேன்; கலர் பந்தை போடுவேன்" என்று பாடி ஐந்து நிமிடங்கள் ஆடினேன். அவ்வளவுதான்!  

= = = = = = = = =