ஒரு சேவை நூடுல்ஸ் ஆகிறது!

சிலபல நாட்களுக்கு முன்வரை தகவல் தொடர்புகளில் அதிகம் பேர் உபயோகித்த தபால் சேவை இப்போது கிட்டத் தட்ட அழியும் நிலைக்கு வந்து விட்டது...

தினசரி காலை 10.30 மணிக்கு மேல் தபால்காரரை எதிர்பார்ப்பது என்பது ஒரு சுகமான Thrill. இன்று யார் யாரிடமிருந்து தபால் வந்தது என்று தெரிந்து கொள்ளும் ஆர்வமும், சுவாரஸ்யமாக எழுதுபவர்கள் எழுதி இருந்தால் அதை ரசித்துப் படிக்கும் இன்பமும் போயே போச்சு. நிச்சயமா இந்தக் கால email ஐ விட ஒரு post card லயே நிறைய எழுதினார்கள். Post card, Inland Letters Bulk ஆக வீட்டில் வாங்கி வைத்து எழுதியதுண்டு. இப்போதெல்லாம் யார் தபாலில் எழுதுகிறார்கள்? 1940 களில் தபால்காரர் காலில் சலங்கையுடன் ஜல் ஜல் என்று சத்தம் எழுப்பிய படி ஒரு கையில் ஈட்டி (வழியில் ஆபத்துக்குப் பாதுகாப்பு) சகிதம் ஓடியே வருவாராம்....அப்பா சொல்வார். இப்போது தபால்காரர் கைகளில் Inland letter, card களைப் பார்க்கவே முடிவதில்லை. இருந்தாலும் ஒரு 10, 12 தேறுமா? ஏதோ மத சம்பந்தப் பட்ட book posts, Telephone Bills தான்...

பின்னர் வந்த காலங்களில் Telephone ஒரு முக்கிய இடத்தைப் பிடித்துக் கொண்டது. அதுவும் படிப் படியாக மாற்றங்களை சந்தித்து, அங்கொன்றும் இங்கொன்றுமாக இருந்த Land line Telephone கள் பிறகு நிறைய ஆகி, பின்னர் அது குறைந்து, Pager இல் தொடங்கி பின்னர் சில பேர் மட்டும் cell phone என்று ஆகி இப்போது எல்லார கையிலும் அலை பேசி... அதில் SMS லேயே பல தகவல் தொடர்புகள் முடிந்து விடுகின்றன.... லெட்டர் போஸ்ட் செய்து அது ஓரிரெண்டு நாட்கள் ஆகும் டெலிவரி ஆக! பிறகு பதிலெழுதுபவர் வேகத்தைப் பொறுத்து நம் கடிதம் சென்று சேர்ந்த விவரம் தெரிய இன்னும் ஓரிரு நாட்கள்... இப்போது? செல்லிலோ மெய்லிலோ அனுப்பிய உடனே டெலிவரி ரிப்போர்ட் உடனடியாக கைகளில்...! தெருவுக்குத் தெரு போஸ்ட் பாக்ஸ் இருக்கும். இப்போதெல்லாம் தப்பித் தவறி லெட்டர் எழுதி போஸ்ட் செய்ய வேண்டும் என்று நினைத்தால் போஸ்ட் பாக்ஸ் தேட வேண்டியதாக உள்ளது. தபால் அலுவலகங்களிலும் ஆட்கள் வர வேண்டி தபால் சம்பந்தப் பட்டவை தவிர என்னென்னமோ விற்கும் ஐடியா உள்ளதாம்..